Barıton Súndet Baıǵojın úshin Eýropaǵa jol ashyldy
ASTANA. QazAqparat - «Astana Opera» teatrynyń jetekshi solısti Súndet Baıǵojın 11 qarashada alǵash ret Verona qalasyndaǵy (Italııa) Filarmonico teatrynda, Dj. Pýchchınıdiń «Bogema» operasynda bas partııada oınaıdy. Kassadaǵy bıletter áldeqashan satylyp ketken, dep habarlady teatrdyń baspasóz qyzmetinen.
Búginde ánshi belgili ıtalıandyq dırıjer ıAder Bınıamınımen qyzý daıyndyq júrgizip jatyr. «Bul men úshin óte mańyzdy qoıylym, sebebi budan ary qaraıǵy eýropalyq mansabym osy jerde qalaı óner kórsetkenime baılanysty. Men «Astana Opera» teatry atynan tek «Bogema» operasynda ǵana emes, sonymen qatar aldaǵy jyldyń 14 sáýirinde osy sahnada qoıylatyn Djoakkıno Rossınıdiń «Sevıldik shashtaraz» operasynda da oınaımyn», - deıdi jetekshi solıst. Aıta keteıik, barıton Súndet Baıǵojın ótken jyldyń 10 qarashasynda Arena dı Verona qory (Italııa) ótkizgen konkýrsta jeńiske jetip, bedeldi ıtalıandyq Filarmonico teatrynda óner kórsetý múmkindigin ıelengen.
