«Barystyń» kapıtany Roman Starchenko rekord ornatty

QYZYLORDA. KAZINFORM - Elordalyq «Barystyń» kapıtany Roman Starchenko bir komanda sapynda 780 oıyn ótkizip, Qurlyqtyq hokkeı lıgasyndaǵy rekordty jańartty.

Qazirge deıin atalǵan rekord Reseıdiń «Metallýrg» (Magnıtogorsk) komandasynda 779 kezdesýde oınaǵan Evgenıı Bırıýkovtiń enshisinde bolatyn.

Óskemen hokkeı mektebinde tálim alǵan 37 jastaǵy Roman 2003 jyldan beri Óskemenniń «Qaztsınk-Torpedo», elordalyq «Barys» komandalarynda oınasa, 2022-2023 jyldarda Reseıdiń «Spartak» (Máskeý) klýbynyń namysyn qorǵady.

Bıylǵy maýsymda Qurlyqtyq hokkeı lıgasynyń turaqty chempıonatynda 39 kezdesýde óziniń esebine 19 upaı jazdy. Qarsylastar qaqpasyna eki shaıba soǵyp, on bes nátıjeli pas berdi.

Aıta ketsek, bıyl elordalyq komanda pleı-off satysyna shyǵa alǵan joq.

Endi Astanada Reseıdiń «Avtomobılıst» (Ekaterınbýrg), «Lada» (Tolıattı), «Sıbır» (Novosibir) komandalaryn qabyldaıdy.