«Barys» jańa bapkermen ekinshi jeńisine jetti
ASTANA. KAZINFORM — Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn elordada Reseıdiń «Sochı» komandasyna qarsy ótkizdi.
Bıyl eki komanda da sátsiz oıyn kórsetip keledi. Elordalyq komanda segiz kezdesýdiń jeteýinde qarsylasyna ese jiberip, bireýinde jeńiske jetti.
Saldarynan týrnır kestesinde eń sońǵy oryndy mise tutyp tur.
Osyndaı sátsizdikten keıin «Barys» komandasynyń bas bapkeri Devıd Nemırovskı qyzmetinen ketti.
Sondaı-aq onyń ornyna reseılik maman Vıacheslav Býtsaev taǵaıyndaldy.
Kezdesý barysynda komandalar tartysty oıyn ótkizdi. Nátıjesinde «Barys» sapynan Ýeıd Ellıson 10-mınýtta mergendik tanytty. Bul gol elordalyq klýbqa jeńis alyp keldi.
Qarsylasynan 1:0 esebimen basym túsken «Barys» týrnır kestesinde bir satyǵa joǵarylap, 22-orynǵa turaqtady.
Qazaqstandyq komanda budan keıingi eki oıynyn da Astanada ótkizedi.
Aldymen 28 qyrkúıekte Reseıdiń «Vıtıaz» (Podolsk) komandasymen kezdesse, 30 qyrkúıekte «Torpedo» (Nıjnıı Novgorod) komandasymen sheberlik baıqasady.
