QHL: «Barys» Reseıdiń SKA komandasynan iri eseppen jeńildi
ASTANA. KAZINFORM - Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn Reseıde SKA (Sankt-Peterbýrg) komandasyna qarsy ótkizdi.
Reseılik klýb jylma-jyl úzdikter qatarynan kórinip keledi. Bıyl da sol úrdispen týrnır kestesinde aldyńǵy orynnyń birinde tur. Olar 54 oıynnan keıin 73 upaımen 5-orynǵa jaıǵasqan.
Esesine «Barystyń» jaǵdaıy máz emes. Elordalyq klýb 53 oıynnan keıin 44 upaımen 19-oryndy mise tutyp turǵan jaıy bar.
Kezdesý barysynda reseılik klýb tizgindi óz qolynda ustady. Nátıjesinde birinshi kezeńde olardyń qatarynan Aleks Galchenıýk 5, Vasılıı Glotov 13-mınýtta mergendik tanytty.
Ekinshi kezeńde SKA sapynan Marat Haırýllın 23-mınýtta komandasynyń basymdyǵan arttyrdy.
Al úshinshi kezeńde olardyń qatarynan Arsenıı Grıtsıýk 42, Marat Haırýllın 43, Vasılıı Glotov 45, Stepan Falkovskıı 52-mınýtta gol soqty.
Osylaısha «Barys» qarsylasynan 0:7 esebimen oısyraı jeńildi.
Elordalyq klýb aldaǵy oıynyn 26 qańtarda Reseıde «Lada» (Tolıattı) komandasyna qarsy ótkizedi.
Eske salsaq, budan buryn elordalyq klýb «Avtomobılıst» komandasyna ese jibergen edi.
