«Barys» reseılik «Traktor» komandasynan jeńildi

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Traktor» (Chelıabi) komandasyna qarsy ótkizdi, dep habarlaıdy Kazinform.

Kezdesý barysynda komandalar tartysty oıyn ótkizdi. Dese de birinshi kezeńde esep ashylǵan joq. 

Ekinshi kezeńde qarsylastar bir-birine qaýipti shabýyldar uıymdastyrýmen boldy. Oıynnyń 35-mınýtynda tóreshi «Barys» hokkeıshisi Entonı Kamarany muz aıdyndaǵy dóreki qımyl-áreketi úshin jazalady. Bes mınýt boıy bir hokkeıshi basymdyǵymen oınaǵan reseılik komandanyń oıynshylary bul múmkindikti qalt jibermeı, qatarynan eki shaıba soǵyp ketti. Vladımır Tkachev 37, Sergeı Telegın 41-mınýtta kózge túsip, komandasyna jeńis syılady. Osylaısha «Barys» qarsylasyna 0:2 esebimen ese jiberdi.

Aıta keteıik, astanalyq klýb bıylǵy maýsymdy sátsiz ótkizip jatyr. Sońǵy 10 oıynnyń nebári úsheýinde ǵana jeńiske jetti. 

Endi «Barys» aldaǵy oıynyn 18 qarashada Reseıde «Metallýrg» (Magnıtogorsk) komandasyna qarsy ótkizedi. 

Eske sala keteıik, buǵan deıin elordalyq komandanyń Reseıdiń «Severstal» komandasynan basym túskenin jazǵan bolatynbyz.