«Barys» Reseıdiń «Severstal» komandasyn overtaımda jeńdi

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Severstal» (Cherepovets) komandasyna qarsy ótkizdi, dep habarlaıdy Kazinform. 

Bıyl elordalyq klýb birinshilikti sátsiz ótkizip keledi. Olar buǵan deıin 37 oıynnan keıin 29 jınap, 23-orynda turǵan edi. Al «Severstal» 36 oıynda 37 upaı jınap, 16-orynda kele jatqan bolatyn.

Kezdesý barysynda qazaqstandyq komanda belsendilik kórsetti. Nátıjesinde 7-mınýtta Entonı Kamara «Barysty» alǵa shyǵarsa, 13-mınýtta reseılik klýbtan Ilıa Ivantsov tarazy basyn teńestirdi.

Al Kırıll Pılıpenko 22-mınýtta «Severstal» komandasynyń basymdyǵyn arttyrsa, «Barys» sapynan Mıhaıl Rahmanov gol soǵyp ketti.

Osylaısha negizgi kezeń 2:2 esebimen teń aıaqtalyp, oıyn overtaımǵa ulasty.

Overtaımda elordalyq klýbtan Evgenıı Rymarev mergendik tanyttyp, «Barys» 3:2 esebimen basym tústi.

Bul – elordalyq klýbtyń qatarynan ekinshi jeńisi.

Eske salsaq, budan buryn elordalyq komanda kósh basyndaǵy «Metallýrgten» basym tústi.

Endi elordalyq klýb 5 jeltoqsanda «Avangard» (Omby) komandasymen kezdesse, 7 jeltoqsanda «Sıbır» (Novosibir) klýbymen sheberlik baıqasady.