«Barys» oıynshylary bas dırektordyń qyzmetinen ketýine baılanysty beıneúndeý joldady

ASTANA. KAZINFORM — Elordalyq «Barys» komandasynyń hokkeıshileri áleýmettik jelide burynǵy bas dırektor Nurlan Orazbaevty qoldaý maqsatynda beıneúndeý joldady. 

8 sáýirde komandanyń baspasóz qyzmeti bas dırektordyń qyzmetinen ketkeni jónindegi aqparatty jarııalaǵan edi. Qazaqstandyq maman atalǵan laýazymǵa 2024 jyldyń qazan aıynda taǵaıyndalǵan bolatyn. 

— Biz, «Barys» hokkeı klýbynyń oıynshylary, burynǵy bas dırektor N. Orazbaevtyń qyzmetinen ketýi jónindegi sheshimine baılanysty málimdeme jasaýdy jón dep sheshtik. Nurlan Saıranuly «Barys» hokkeı klýbynyń qalyptasýynyń basynda turdy. Barlyq oıynshy oǵan senedi jáne onyń kásibı deńgeıine eshqandaı kúmán keltirmeıdi. Onyń klýb júıesine kelýi jergilikti oıynshylardyń damý vektoryna da aıtarlyqtaı ózgeris ákeldi, - dedi hokkeıshiler. 

Sondaı-aq olar bul maýsymda qazaqstandyq hokkeıshilerge kóp múmkindik berilgenin, jergilikti oıynshylardyń aıdynǵa shyǵyp, óner kórsetýi jaǵynan da rekordtyq kórsetkishke jetkenin atap ótti. 

— Bas dırektor tarapynan turaqty túrde qoldaý kórsetildi. Biz tolyq senim artylǵanyn sezdik jáne ol aldaǵy ýaqytta «Barys» hokkeı klýby men Qazaqstan ulttyq quramasyna paıdasyn tıgizetinine sendik. Nurlan Saıranuly qazaqstandyq hokkeıshilerge ár oıynda jankúıer bolady jáne bizdi árqashan qoldaıdy. Ol komandanyń ár daıyndyǵy men oqý-jattyǵýyna qatysady. Biz osy rette oǵan óz alǵysymyzdy bildirgimiz keledi, - dedi hokkeıshiler beıneúndeýinde. 

Buǵan deıin Nurlan Orazbaevtyń «Barys» komandasynyń bas dırektory qyzmetinen ketkenin habarlǵan edik.