«Barys» on birinshi márte jeńilistiń aşy dámin tatty
ASTANA. KAZINFORM - Qazaqstandyq «Barys» komandasy búgin, 5 qazanda Qurlyqtyq hokkeı lıgasyndaǵy kezekti oıynyn Reseıde «Avangard» (Omby) komandasyna qarsy ótkizdi.
Kezdesýdiń birinshi kezeńinde gol soǵylǵan joq. Ekinshi kezeńde reseılik klýb qataryna eki shaıba soǵyp ketti. Ony Alekseı Makeev 28, Semen Chıstıakov 29-mınýtta óziniń enshisine jazdy.
Al Rıd Býshe 47, Lınden Veı 58-mınýtta ombylyq klýbtyń basymdyǵyn arttyra tústi. Osylaısha «Barys» qarsylasyna 0:4 esebimen jeńilip, sátsizdik serııasy odan ári jalǵasty.
Elordalyq klýb bıylǵy maýsymdy sáztsiz ótkizip keledi. Qazirge deıin on eki oıynnyń onynda jeńilistiń aşy dámin tatty. Sátsizdik serııasyn toqtata almaı kele jatqan elordalyq klýb qazirdiń ózinde kanadalyq maman Devıd Nemırovskıdi qyzmetinen alyp, ornyna reseılik Vıacheslav Býtsaevty alyp keldi.
Komanda jańa bapkermen alǵashqy oıynda jeńiske jetkenimen odan keıin qaıtadan úsh márte jeńilip qaldy.
Elordalyq «Barys» komandasy 4 hokkeıshini qataryna qosty. Olardyń qatarynda atalǵan ujymnyń namysyn buryn qorǵaǵan kanadalyq qorǵaýshy Aleks Grant ta bar. Sondaı-aq komanda sapyna reseılik Nıkıta Setdıkov, Ilıa Hohlov, Stanıslav Bocharovpen maýsym sońyna deıin kelisimshartqa qol qoıdy.
Endi elordalyq klýb taǵy bir oıynyn syrt aıdynda ótkizip, 7 qazanda «Avtomobılıst» (Ekaterınbýrg) komandasymen sheberlik baıqasady.
