«Barys» mınskilik «Dınamodan» jeńilip qaldy

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Belarýstiń «Dınamo» (Mınsk) komandasyna qarsy ótkizdi, dep habarlaıdy Kazinform.

Kezdesý barysynda komandalar alǵashqy eki kezeńde bir-biriniń qaqpasynan sańylaý taba alǵan joq.

Degenmen elordalyq hokkeıshiler tarapynan jıi tártip buzý tirkelip, olar úsh márte aıdynnan qýyldy.

Belarýs hokkeıshileri bir márte tártip buzdy.

Úshinshi kezeńde de oıyn barysynda qos komanda shabýylǵa jıi kóńil bóldi.

Oıynnyń 53-mınýtynda «Dınamo» sapynan Aleksandr Volkov esep ashsa, 58-mınýtynda qazaqstandyq Ádil Beketaev tarazy basyn teńestirdi.

Negizgi kezeńi 1:1 esebimen teń aıaqtalyp, oıyn overtaımǵa ulasty.

Overtaımda mınskilik klýbtan Vadım Moroz jeńis shaıbasyn soǵyp ketti.

Osylaısha «Barys» qarsylasyna 1:2 esebimen jol berdi.

Endi qazaqstandyq klýb aldaǵy oıynyn 29 qazanda elordada Reseıdiń «Torpedo» (Nıjnıı Novgorod) komandasyna qarsy ótkizedi.

Eske salsaq, budan buryn «Barys» Reseıdiń «Avtomobılıst» komandasyna ese jiberdi.