«Barys» komandasynyń bas dırektory: Jastarǵa ózderin kórsetýge múmkindik berýimiz kerek
ASTANA.KAZINFORM – Elordalyq «Barys» hokkeı klýbynyń basshylyǵy búgin «Barys Arena» baspasóz ortalyǵynda BAQ ókilderimen kezdesti.
«Barys» komandasynyń bas dırektory Nurlan Orazbaev maýsymdy qortyndylyp, aldaǵy maýsymnyń strategııasy týraly jáne legıonerler týraly aıtyp berdi.
Klýb basshysy «Barys» oıynshylary maýsymdy jaqsy aıaqtaǵanyn jáne jańa komanda jasaqtalǵanyn aıta ketti.
Onyń sózinshe, komanda sapynda 16 jas oıynshy Qurlyqtyq hokkeı lıgasynda (QHL) debıýt jasap, olardyń qatarynda 18 jasar Aleksandr Sımahın jáne Raty Dýrglıshvılı eresekter arasynda alǵashqy shaıbasyn soqqan.
Sonymen qatar, Nurlan Orazbaev legıonerler týraly pikir bildirdi.
– Birinshiden, Soltústik Amerıkanyń oıynshylaryn shaqyrýǵa qarjylyq múmkindigimiz joq. Bizde jaqsy mektep bar. Bul kúnde elimizde 39 hokkeı mektebi jumys istep tur. Sonymen qatar bizde bir komanda QHL-da oınaıdy. Biz jastarǵa ózderin kórsetýge múmkindik berýimiz kerek, olar osy deńgeıdi sezinýi kerek, - dedi ol.
Klýb basshysynyń aıtýynsha, komanda joǵary nátıjege qol jetkizý úshin, joǵary deńgeıdegi legıonerler kerek.
– Biz Soltústik Amerıka oıynshylaryn ne úshin shaqyrǵanymyzdy túsinýimiz kerek. Eger qazir úzdik segizdikke ený týraly aıtatyn bolsaq, onda 7-8 adam (legıoner) kerek. Olardyń deńgeıi joǵary bolýy jáne alańda kóp ýaqyt oınaýy kerek. Olar bizdiń oıynshylardyń ýaqytyn alady. Jalpy, biz deńgeıdi kóterýimiz kerek. Onyń ústine legıonerlerge qatysty zań keshe maquldandy, bizdiń tóleýge múmkindigimiz joq,- dedi Nurlan Orazbaev.
«Barys» komandasynyń bas dırektory qarjylyq teńgerimsizdik bar ekenin jasyrmady. Onyń sózinshe, qarjy máselesi sheshilmeıinshe, klýb qymbat sheteldik oıynshylardan bas tartady.
Budan buryn habarlanǵandaı, Senat «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańyn maquldady.
QR Týrızm jáne sport vıtse-mınıstri Serik Jarasbaevtyń aıtýynsha, hokkeı sportynda qazir 109 legıoner bar.