«Barys» qatarynan úshinshi márte jeńiske jetti
Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Traktor» (Chelıabi) komandasyna qarsy ótkizdi, dep habarlaıdy Kazinform.
Qazaqstandyq komanda eski jyldaǵy sońǵy oıynynda jınaqy qımyl kórsete aldy. Nátıjesinde birinshi kezeńde qarsylas komanda qaqpasyna jaýapsyz úsh shaıba soǵyp úlgerdi.
Aldymen 8-mınýtta Arkadıı Shestakov mergendik tanytsa, 9-mınýtta Davıd Sklenıchka kózge tústi. 16-mınýtta Rýdolf Cherveny basymdyqty arttyryp, esepti ústemeledi.
Kezdesýdiń 23-mınýtynda Entonı Kamara elordalyq komandanyń bul oıyndaǵy tórtinshi golyn óz atyna jazdy.
Úshinshi kezeńde de komandalar bir-biriniń qaqpasynyń mańynda jıi shabýyl uıymdastyrdy. Nátıjesinde reseılik hokkeıshi Nıkıta Soshnıkov 48-mınýtta esep aıyrmasyn qysqartsa, qazaqstandyq Arkadıı Shestakov «Barys» komandasynyń besinshi shaıbasyn salyp, oıynnyń núktesin qoıdy. Osylaısha elordalyq klýb qarsylasynan 5:1 esebimen basym túsip, qatarynan úshinshi márte jeńiske jetti.
Endi «Barys» aldaǵy oıynyn 2024 jyldyń 3 qańtarynda Reseıde «Lokomotıv» (ıAroslavl) komandasyna qarsy ótkizedi.
Eske salsaq, budan buryn «Barys» hokkeıshileri qatarynan ekinshi márte jeńiske jetken bolatyn.
