«Barys» qatarynan úshinshi márte jeńildi

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Torpedo» (Nıjnıı Novgorod) komandasyna qarsy ótkizdi, dep habarlaıdy Kazinform.

Birinshi kezeńde komandalar birden shabýylǵa kóshti. Nátıjesinde «Torpedo» sapynan Sergeı Goncharchýk 1-mınýtta esep ashsa, 3-mınýtta «Barys» sapynan Arkadıı Shestakov tarazy basyn teńestirdi.

Ekinshi kezeńde reseılik komanda úsh shaıba soǵyp ketti. Ony Vasılıı Atanasov 29, Maksım Letýnov 37, Vladıslav Fırstov 39-mınýtta óziniń enshisine jazdy.

Al 51-mınýtta elordalyq klýbtan Rýdolf Cherveny esep aıyrmasyn qysqartty.

Osylaısha «Barys» qarsylasyna 2:4 esebimen ese jiberdi. Saldarynan elordalyq klýb qatarynan úshinshi márte jeńildi.

Endi «Barys» aldaǵy oıynyn 23 qarashada elordada Reseıdiń «Neftehımık» (Nıjnekamsk) komandasyna qarsy ótkizedi.

Eske salsaq, budan buryn «Nomad» komandasy shaıbaly hokkeıden Qurlyq kýbogynyń fınalyna shyqty.