«Barys» hokkeıshileri búgin Reseıdiń «Traktorymen» kezdesedi

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Traktoryna» (Chelıabi) qarsy ótkizedi, dep habarlaıdy Kazinform agenttigi.

Kezdesý búgin, 9 qazan kúni, saǵat 19:30-da bastalady.

Eki komanda buǵan deıin 52 márte kezdesti. Onyń 29-y elordalyq klýbtyń basymdyǵymen aıaqtalsa, qalǵanynda reseılik komanda jeńiske jetti.

Týrnır kestesinde «Barys» 15 oıynnan keıin 11 upaımen 21-orynda tur, al «Traktor» 16 oıynnan keıin 18 upaımen 10-orynǵa ornalasty.

Aıta keteıik, astanalyq klýb bıylǵy maýsymdy sátsiz ótkizip keledi. Sońǵy 10 oıynnyń nebári úsheýinde jeńiske jetti.

«Barys» budan keıin taǵy 3 kezdesýin óz alańynda ótkizedi. Aldymen, 11 qazanda Reseıdiń «Dınamo» (Máskeý) komandasymen kezdesse, odan keıin 13 qazanda «Lokomotıv» (ıAroslavl), 15 qazanda «Metallýrg» (Magnıtogorsk) klýbymen sheberlik baıqasady.

Eske salsaq, budan buryn «Barys» elordada Reseıdiń «Vıtıazinen» (Podolsk) jeńilip qalǵan edi.

Andreı Skabelka «Barys» komandasynyń bas bapkeri qyzmetinen ketkenin jazǵan bolatynbyz. Onyń ornyna qazaqstandyq maman Ǵalym Mámbetálıev bas bapkerdiń mindetin atqarýshy bolyp taǵaıyndaldy.

Jańadan jasaqtalǵan bapkerlik quramǵa Konstantın Pýshkarev, Aleksandr Vysotskıı, Erlan Saǵymbaev, Aleksandr Berezenskıı endi.