«Barys» hokkeı komandasynyń bas dırektory taǵaıyndaldy
ASTANA. KAZINFORM - «Barys» hokkeı komandasynyń bas dırektory qyzmetine Sáken Musaıbekov taǵaıyndaldy.
Sáken Júnisbekuly 1967 jyly Soltústik Qazaqstan oblysynda dúnıege kelgen. V.I.Lenın atyndaǵy Qazaq polıtehnıkalyq ınstıtýtyn, Qazaq memlekettik basqarý akademııasyn támamdaǵan.
Ár jyldary QR Parlamenti Májilisi tóraǵasynyń kómekshisi, QR memlekettik kiris mınıstriniń keńesshisi, QR Qarjy mınıstrligi ákimshilik departamentiniń dırektory, QR Kólik jáne kommýnıkatsııa mınıstrligi Avtomobıl joldary komıtetiniń «Qazaqavtojol» RMK bas dırektorynyń orynbasary, QR Qarjy mınıstrligi apparatynyń basshysy, QR Kólik jáne kommýnıkatsııa vıtse-mınıstri bolyp, ózge de salalarda qyzmet atqarǵan.
Sáken Musaıbekov sport salasynda basshylyq qyzmette bolǵan. Buǵan deıin Sáken Júnisbekuly Qazaqstan hokkeı federatsııasy bas dırektorynyń qyzmetin atqardy.
Aıta ketsek, bıyl sáýir aıynda Nurlan Orazbaev «Barys» komandasynyń bas dırektory qyzmetinen ketti.
Bıyl «Barys» Qurlyqtyq hokkeı lıgasynda sátsiz oıyn kórsetti. Shyǵys konferentsııasynda 12 oryn alyp, 68 oıynnan keıin nebári 35 upaı jınady.