«Barys» hokkeı klýbynyń eń qymbat legıoneri bir maýsymda 325 mln teńge alady

Májilistiń áleýmettik-mádenı damý komıtetiniń otyrysynda depýtat Nartaı Sársenǵalıev «Barys» hokkeı klýbynyń legıonerlerine tólenetin aılyqty áleýmettik ádiletsizdik dep atady, dep habarlaıdy Kazinform.

«Sizderge sport-express.ru-daǵy resmı sandardy aıtaıyn, halyq ta bilsin. «Barys» hokkeı klýbynyń 2023-2024 jyldarǵa arnalǵan jalaqy vedomstvosy tur myna jerde. Mysaly, birinshe orynda «Barystyń» oıynshysy Edýard Paskýale degen legıonerimiz bir maýsymǵa 65 mln rýbl alady eken. Bizdiń aqshamen 325 mln teńge. Ekinshi oryndar boıynsha Aleks Grant degen legıoner 58 mln rýbl alady. Úshinshi oryndaǵy Nelson Noje degen legıoner 35 lmn rýblt alady. Sol Nelson Noje 2022-203 jyly 18 mln rýbl alǵan, endi 35 mln rýblge aılyǵy ósip ketken. «Barystaǵy» eń kóp jalaqy alatyn 29 sportshynyń alǵashqy oryndaǵy toǵyzy legıoner», - dedi ol.

Depýtat jalpy «Barys» hokkeı klýbynyń bir jyldaǵy jalaqysyna 486 mln rýbl ketetinin atap ótti.

«Bul bizdiń aqshaǵa shaqqanda 2,5 mlrd teńge. Bizdegi áleýmettik jaǵdaımen qaraǵan kezde bul ádiletti me? Osyndaı qymbat legıoner jalpy bizge kerek pe? 2,5 mlrd teńgeni biz tek aılyq retinde hokkeıge berýimiz kerek pe? Bul hokkeıshilerdiń maýsymdaǵy salǵan shaıbasy men, upaı alǵan oıyndary úshin beriletin bonýstardy qospaǵandaǵy sandar. Osynsha hokkeıshilerdi ustaıtyndaı biz baı memleket emespiz ǵoı. Bul aqparat jalǵan deseńizder, ony aıtyńyzdar», - dedi Nartaı Aralbaı Sársenǵalıev.

Týrızm jáne sport vıtse-mınıstri Serik Jarasbaev atalǵan sandardyń bári shyn ekenin rastady.