«Barys» elordada «Sıbır» komandasynan basym tústi

ASTANA. KAZINFORM – Jańa maýsymǵa daıyndyq aıasynda «Barys» hokkeı klýby Astanada Reseıdiń «Sıbır» (Novosibir) komandasymen alǵashqy baqylaý oıynyn ótkizdi.

Kezdesý barysynda komandalar bastapqy mınýttan tartysty oıyn ótkizdi. Degenmen birinshi kezeńde tablodaǵy esepke ózgeris engen joq.

Ekinshi kezeńdi qazaqstandyq komanda belsendi bastady. Nátıjesinde 22-mınýtta «Barys» sapynan Kırıll Savıtskıı áriptesi Álıhan Ómirbekovtiń pasyn sheber paıdalanyp, komandany alǵa shyǵardy. Odan keıin 22-mınýtta Djeık Massı elordalyq klýbtyń basymdyǵyn arttyrdy.
Oǵan 29-mınýtta «Sıbır» quramynan Skott Ýılson bir golmen jaýap qaıyrsa, 58-mınýtta «Barys» shabýylshysy Álıhan Ásetov qorytyndy esepti belgiledi. Osylaısha elordalyq klýb qarsylasynan 3:1 esebimen basym tústi.

Endi eki komanda arasyndaǵy taǵy bir oıyn 2 qyrkúıekte 18:00-ge belgilengen.

Qazaqstandyq klýb Qurlyqtyq hokkeı lıgasyndaǵy jańa maýsymda alǵashqy úsh oıyndy elordada ótkizedi. Aldymen 7 qyrkúıekte Reseıdiń «Traktor» (Chelıabınsk) komandasymen kezdesse, odan keıin 9 qyrkúıekte «Amýr» (Habarovsk), 13 qyrkúıekte Belarýstiń «Dınamo» (Mınsk) klýbtarymen sheberlik baıqasady.

Aıta ketsek, bıyl elordalyq klýbpen AQSh hokkeıshileri Ien Makkosh, Maıkl Vekkone, Raılı Ýolsh, Taıs Tompson, kanadalyq Djeık Massı, reseılik Vladımır Volkov, Emıl Galımov, qazaqstandyq Kırıll Panıýkov, Kırıll Savıtskıı, Batyrlan Muratov, Roman Starchenko jáne ózge de oıynshylar kelisimshartqa qol qoıdy.