«Barys» elordada «Amýrǵa» ese jiberdi

ASTANA. KAZINFORM – Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn elordada Reseıdiń «Amýr» (Habarovsk) komandasyna qarsy ótkizdi.

Kezdesý barysynda elordalyq komanda belsendi bastady. Nátıjesinde 4-mınýtta Roman Starchenko reseılik klýbtyń qaqpasynan sańylaý tapty. 

Oıynnyń 26-mınýtynda «Amýr» sapynan Aleks Brodherst tarazy basyn teńestirip ketti.
Al 48-mınýtta olardyń qatarynan ıAn Drozg reseılik klýbty alǵa shyǵardy.

Oıynnyń 51-mınýtynda «Barys» hokkeıshisi Arkadıı Shestakov mergendik tanytty. Esep 2:2. 
Overtaımda «Amýr» hokkeıshisi Vladıslav Barýlın oıynnyń núktesin qoıdy.

Osylaısha qarsylasyna overtaımda 2:3 esebimen ese jiberdi. Bul - elordalyq klýbtyń qatarynan jetinshi jeńilisi. 

Aıta ketsek, elordalyq komandanyń pleı- off satysyna shyǵý múmkindigi qıyndap barady. Qazir oǵan shyǵýǵa jol ashatyn 16-oryndaǵy komandadan 13 upaıǵa qalyp tur. Alda nebári 11 oıyn ǵana qaldy. 

Qazaqstandyq ujym budan keıingi úsh oıyndy da elordada ótkizedi. Aldymen 6 aqpanda «Amýr» (Habarovsk) klýbymen qaıta kezdesse, 8 aqpanda SKA (Sankt- Peterbýrg), 10 aqpanda «Spartak» (Máskeý) klýbtarymen oınaıdy.

Eske salsaq, budan buryn «Barys» qatarynan altynshy márte jeńildi.