«Barys» elordada «Ak Barsqa» býllıtten ese jiberdi

ASTANA. KAZINFORM - Qazaqstandyq «Barys» komandasy búgin, 5 qarashada Qurlyqtyq hokkeı lıgasyndaǵy kezekti oıynyn elordada Reseıdiń «Ak Bars» (Qazan) komandasyna qarsy ótkizdi.

Qazaqstandyq komanda keıingi oıyndarda jınaqylyq kórsete bastady. Negizinen qazaqstandyq hokkeıshilerden quralǵan ujym tájirıbeli klýbtarǵa qarsy oń nátıjege qol jetkizip otyr. Alty oıynnyń úsheýinde jeńiske jetip, týrnır kestesindegi sońǵy oryndy artta qaldyrdy. 

Búgingi kezdesýde reseılik klýb sapynan Dmıtrıı Katelevskıı 2-mınýtta esep ashyp ketti. Odan keıin elordalyq klýb tarazy basyn teńestirýge umtyldy.

Ekinshi kezeńde qos komandanyń gol soǵatyn birneshe múmkindigi bolǵan edi. Osyndaı sátterdiń birinde elordalyq klýbtan Ańsar Shaıhmeddenov 39-mınýtta kózdegen nysanadan múlt ketken joq.

Negizgi kezeń 1:1 esebimen teń aıaqtalyp, oıyn overtaımǵa ulasty. Overtaımda jeńimpaz anyqtalǵan joq. Býllıtte «Ak Bars» komandasynyń joly boldy.

Endi qazaqstandyq komanda budan keıingi bir oıynyn elordada ótkizedi. 7 qarasha kúni «Avtomobılıst» (Ekaterınbýrg) klýbymen sheberlik baıqasady.