«Barys» bes oıynǵa sozylǵan sátsizdik serııasyn toqtata aldy

ASTANA. KAZINFORM — Qazaqstandyq «Barys» komandasy búgin, ıaǵnı 7 qarashada Qurlyqtyq hokkeı lıgasyndaǵy kezekti oıynyn elordada Reseıdiń «Avtomobılıst» (Ekaterınbýrg) komandasyna qarsy ótkizdi. 

Elordalyq komanda keıingi oıyndarda sátsiz ótkizip keledi. Sońǵy bes kezdesýde jeńilistiń aşy dámin tatqan komanda týrnır kestesinde jaǵdaıyn birshama qıyndatyp aldy. Sondyqtan búgingi matchta olar jeńiske jetýge bar kúshin salatyny anyq edi.

Kezdesý barysynda qazaqstandyq komanda alǵashqy mınýttan tizgindi óz qolynda ustaýǵa tyrysty. Nátıjesinde 23-mınýtta Dinmuhamed Qaıyrjan qaqpany dál kózdese, Meıson Morellı 28-mınýtta esepti ulǵaıta tústi. 

Oıynnyń 31-mınýtynda reseılik klýbtan Kertıs Volk mergendik tanytsa, 40-mınýtta Aleksandr Sharov tarazy basyn teńestirdi.

Negizgi kezeńde 2:2 esebimen aıaqtalyp, oıyn overtaımǵa ulasty. Overtaımda elordalyq klýbtan Taıs Tompsonjeńis shaıbasyn soǵyp ketti.

Osylaısha «Barys» qatarynan bes jeńilisten keıin qarsylasyn qapy qaldyrýǵa múmkindik týdy.

Qazaqstandyq klýb budan keıin taǵy bir oıynyn elordada ótkizip, 9 qarashada Reseıdiń «Metallýrg» (Magnıtogorsk) klýbymen sheberlik baıqasady.