«Barys» babyna qashan keledi
Bıyl qazaqstandyq «Barys» komandasy Qurlyqtyq hokkeı lıgasynda sátsiz oıyn kórsetip keledi. Qazir týrnır kestesinde sońǵy oryndardyń birin mise tutyp tur. Komandanyń aldaǵy ýaqytta pleı-off satysyna shyǵatyn múmkindigi qandaı? Kazinform atalǵan taqyrypqa baılanysty mamandar, sport jýrnalısteri, jankúıerler pikirin tarazylap kórgen edi.
«Legıonerler úmitti aqtasa deımiz»
Elordalyq komanda dúbirli dodaǵa 2008 jyldan beri turaqty túrde qatysyp keledi. Sodan beri úsh márte ǵana pleı-off satysyna shyǵa alǵan joq. Al tórt márte Shyǵys konferentsııasynda jartylaı fınalǵa deıin jetti. Qazaqstandyq jankúıerler jylma-jyl komandanyń joǵary bıikten kóringenin qalaıdy. Dese de sońǵy jyldardaǵy sátsizdik jankúıerler kóńilinen shyqpaı júrgeni jasyryn emes.
Komanda bıyl negizinen jergilikti jastarǵa úmit artyp otyr. Ulttyq qurama sapynda álem chempıonatyna qatysqan qazaqstandyq hokkeıshiler «Barys» quramynda muz aıdynǵa shyǵýǵa múmkindik aldy. Mamandar bul durys sheshim ekenin aıtady. Óıtkeni, jastar tájirıbeli klýbtarǵa qarsy oınap, sheberligin shyńdaı túsedi. Aınalyp kelgende, ol ulttyq quramanyń úzdikter qatarynda joǵary deńgeıde oıyn kórsetýine jol ashady.
Qazaqstandyq bilikti bapker Ǵalym Mámbetalıev el quramasyn álem chempıonaty bastalardan sál buryn ǵana qolǵa aldy. Soǵan qaramastan hokkeıshilerimiz azýly qarsylastarymen terezesi teń deńgeıde oıyn kórsetti. Nátıjesinde top-dıvızıondaǵy ornyn saqtap qaldy. Osylaısha qazaqstandyq hokkeıshiler de ózderiniń sheberligi eshkimnen kem emes ekenin dáleldedi. Dese de keıbir sátte olardyń tájirıbesi jetispeı jatqany kórinip turdy. Burynǵy jyldarda ulttyq quramanyń ózine amerıkandyq, kanadalyq jáne ózge de shetelden kelgen legıonerlerdi tartýǵa májbúr bolǵanymyz jasyryn emes. Alaıda olardyń ózi ulttyq quramanyń joǵary deńgeıde oıyn kórsetýine zor úles qosty dep aıta almaımyz.
Uzaq jyldan beri qazaqstandyq hokkeıge jankúıerlik jasap júrgen Erkin Ábil jergilikti jastarǵa kóbirek úmit artý qajettigin aıtady.
«Negizinde álemde burynǵy jyldarda qazaqstandyq hokkeıshiler joǵary baǵalanatyn edi. Kezinde NHL-da oınaǵan Evgenıı Nabokov, Nıkolaı Antropov, Vıtalıı Eremeev, Vıtalıı Kolesnık, Konstantın Pýshkarev syndy sańlaqtarymyz boldy. Qazir eshqandaı hokkeıshimiz atalǵan lıgada oınap júrgen joq. Meniń oıymsha, aldaǵy ýaqytta óz úzdikterimizdi daıyndap shyǵarýǵa múmkindik berýimiz qajet. Sodan keıin olardyń álemniń úzdik lıgalarynda baq synaýyna jol ashylady. Ókinishtisi, qazir bul jóninen maqtana almaımyz. Alda atqarylatyn aýqymdy ister bar dep oılaımyn», — deıdi ol.
Pleı-offqa shyǵa ala ma?
Elordalyq komanda bıyl 38 kezdesýdiń nebári 12-de jeńiske jetti. Qazir týrnır kestesinde 31 upaımen 22-orynda keledi. Ras, áli de pleı-off satysyna shyǵýyna múmkindigi joq emes. Ol úshin qazaqstandyq komanda aldaǵy oıyndarda jınaqy qımyl kórsetip, upaı qoryn molaıta túsýi tıis. Oǵan múmkindik te bar sekildi.
«Barys» hokkeıshileri sońǵy oıyndarda qatarynan eki márte jeńiske jetti. Aldymen kósh basynda kele jatqan Reseıdiń «Metallýrg» (Magnıtogorsk) komandasyn 5:2 esebimen tize búktirse, odan keıin «Severstal» (Cherepovets) klýbyn 3:2 esebimen qapy qaldyrdy.
Elordalyq komanda «Severstaldi» jeńgennen keıin bas bapker Ǵalym Mámbetálıev: «Jigitterdiń ózine senýi úshin komandada jaqsy mıkroklımat jasap kelemiz. Olar jeńe alatynyna sendi», — dep aǵynan jarylǵan edi.
Bıyl «Barys» quramynda oınap júrgen hokkeıshilerdiń negizgi bóligi jastar ekenin aıta ketkenimiz artyq emes. Atap aıtqanda, olardyń qatarynda Dinmuhamed Qaıyrjan, Ańsar Shaıhmeddenov, Batyrlan Muratov, Álıhan Ómirbekov, Vsevolod Logvın, Alesandr Borısevıch, Samat Danııar sekildi jastar bar. Bul hokkeıshilerdiń 21-25 jasta ekenin eskersek, olardyń budan ári sheberligin shyńdaýyna múmkindik jasalýy qajet.
Ǵalym Mámbetálıev «Barys» bas bapkeriniń mindetin atqarýmen birge ulttyq quramaǵa jetekshilik jasaıtynyn eskergenimiz abzal. Endeshe, tájirıbeli maman jergilikti jastarǵa kóbirek senim artyp júrgenin bilemiz.
«Jastarǵa senim artqan durys»
Belgili sport jýrnalısi Nurǵazy Sasaev hokkeı taqyrybynda jıi oı qozǵap keledi. Onyń aıtýynsha, árbir komandanyń tek legıonerlerge ıek artyp otyrýy durys emes.
«Negizinde árbir komandanyń alǵa qoıǵan jospary bolýy tıis. «Barys» qurylǵan alǵashqy jyldarda qazaqstandyq hokkeıshilerdiń deńgeıin kóterýge kúsh saldy. Árıne, Qurlyqtyq hokkeı lıgasynda tájirıbeli komandalarǵa qarsy turýy úshin úzdik legıonerlerdi komanda quramyna tartqan artyq emes. Osy maqsatta alǵashqy bestiktegi hokkeıshiler sheteldikter boldy. Nátıjesinde táp-táýir nátıjege qol jetkize aldyq. Sebebi, bul bestigimiz QHL-da úzdikter qatarynda edi. Olarǵa kóbi qarsy tura alǵan joq. Qazir she? Legıonerlerge ondaı talap joq sekildi. Keıbiri tipti talapqa da saı emes ekenin ańǵardyq. Byltyr jáne bıylǵy jyldyń basynda 21 oıynshynyń basym bóligi sheteldik oıynshylar boldy. Saldarynan qazaqstandyq hokkeıshilerge eshqandaı múmkindik berilgen joq. Endigi kezekte jergilikti oıynshylarǵa jol ashyp otyrǵanymyz durys. Qurlyqtyq hokkeı lıgasynan buryn ulttyq quramanyń deńgeıin joǵarylatýǵa mán bergenimiz jón», — dedi ol.
Ras, hokkeı fýtbol sekildi qymbat sport túrine jatady. Dese de álemde oǵan degen kózqaras erekshe. Sondyqtan elimizde sporttyń bul túrine degen qoldaýdyń óz deńgeıinde bolǵany bizge qajet. Bul maqsatta arnaıy joba, jospardyń jasalǵany oryndy.
