«Bárimiz birdeımiz - kemsitýdi bilmeımiz!» baıqaýy úsh jylda bir ret uıymdastyrylady - mınıstr T.Dúısenova
ASTANA. 25 qazan. QazAqparat - «Bárimiz birdeımiz - kemsitýdi bilmeımiz!» atty respýblıkalyq baıqaý úsh jylda bir uıymdastyrylatyn bolady. Bul týraly búgin jýrnalısterge suhbat bergen QR Eńbek jáne halyqty áleýmettik qorǵaý mınıstri Tamara Dúısenova málim etti.
Mınıstr atap kórsetkendeı, atalǵan shara barysynda múmkindigi shekteýli azamattardyń shyǵarmashylyq qabiletimen qatar ıntellektýaldy daıyndyǵy da shyńdalady. «Bul baıqaý múgedek jandardyń qazaqstandyq qoǵamnyń tolyqqandy múshesi bola alatyndyǵyn kórsetti. Sondyqtan biz «Bárimiz birdeımiz - kemsitýdi bilmeımiz!» atty respýblıkalyq baıqaýdy úsh jylda bir ret ótkizýdi uıǵardyq. Osy ýaqyttyń ishinde olar daıyndalyp, óz ónerlerin taǵy bir márte pash etpek», - deıdi T.Dúısenova. Aıta keteıik, bıyl alǵash ret uıymdastyrylǵan baıqaýǵa Qazaqstannyń túkpir-túkpirinen 6 myńnan astam múmkindigi shekteýli azamat qatysty. Olar bir-birimen aralasyp, qoǵam ómirine óz úlesterin qosa alatyndaryn ashyq kórsetti. «Múmkindigi shekteýli azamattardyń deni saý adamnan esh jeri kem emes. Ony án, bı, qolóner jáne taǵy basqa saıystardan anyq baıqaýǵa bolady. Olar da bir ókinip, bir qýanady. Máselen, Daýna sındromy bar bizdiń bir balamyz bı bılep, birinshi orynǵa ıe boldy. Daıyndyqta bir nárse durys shyqpaı jatsa, ol kádimgideı namystanady, kózine jas alyp, budan da jaqsy bıleýge tyrysady. Mine, osy bir mysal múmkindigi shekteýli azamattardyń batyldyǵyn, ómirge degen qulshynysyn kórsetse kerek», - deıdi Pavlodar oblysynyń ókili, pedagog-psıholog Aınagúl Kárimova.
