Barents teńizinde reseılik balyqshylar mingen keme sýǵa batty
NUR-SULTAN. QazAqparat – Keme Reseı Federatsııasynyń Arhangelsk oblysyndaǵy Novaıa Zemlıa araly mańynda batty. Onyń bortynda 19 adam bolǵan. Bul týraly QazAqparat TASS agenttigine silteme jasap habarlaıdy.
«Saǵat 07:30-da Barents teńizi aıdynynyń Arhangelsk oblysyndaǵy Novaıa Zemlıa mańynda «Onega» kemesiniń batqany týraly habarlama kelip tústi. Kemeniń ekıpajy 19 adamnan quralǵan. Eki adam qutqaryldy, «Voıkovo» kemesi izdeý sharalaryn júrgizýde», - dedi RF TJM baspasóz qyzmeti.
Vedomstvonyń málimetinshe, kemeniń batýyna muz qatý sebep bolǵan.
Ekıpajdy izdeý jumystaryna bes keme jiberildi.
«Qazirgi kezde ekıpajdy izdeýge bes keme jiberilgen. Solardyń biri gıdrokostıým kıip alǵan eki teńizshini kóterdi, olar din aman. Qalǵandarymen baılanys joq», - dedi agenttikke qutqarý qyzmetinen. Ol, sondaı-aq, aýa raıynyń qolaısyzdyǵyna baılanysty avıatsııanyń izdeý sharalaryna qatysa almaıtynyn qosyp ótti.
Derekkózdiń atap ótýinshe, aldyn ala málimetter boıynsha, qutqarylǵan eki teńizshi – matros pen shtýrman Reseı azamattary.
Mýrmansk kólik prokýratýrasy bolǵan oqıǵany tekserý jumystaryn júrgizýde. Onyń qorytyndysy Soltústik-Batys kóliktik prokýratýranyń qadaǵalaýynda tur.
«Onega» – sýǵa 1979 jyly túsirilgen balyq aýlaıtyn keme. Syıymdylyǵy – 358 tonna.
