Barar jer, basar taýymyz joq: Oralda turǵyndar apatty úıde turyp jatyr
ORAL. KAZINFORM — Oral qalasynda Q.Amanjolov kóshesi 32 mekenjaıynda ornalasqan úıdiń jaı-kúıi týraly áleýmettik jelide aqparat jarııalandy. Turǵyndardyń sózine qaraǵanda, jýyrda osy úı aýlasyndaǵy saraıdyń bir bóligi qulap túsken.
Abyroı bolǵanda, adam shyǵyny men zardap shekkender joq. Alaıda bul oqıǵa úıdiń de asa qaýipti jaǵdaıda ekenin taǵy bir márte kórsetti.
Ǵımarattyń tozyǵy jetkeni sonshalyq, ony jóndeýmen másele sheshilmeıtini anyq. Úıdiń ábden eskirgeni, ómir súrýge qaýip tóndiretini kún saıyn baıqalyp otyr.
— Erteń turǵyn úıdiń ózi qulamasyna kim kepil? Adam ómirine qaýip tóngennen keıin ǵana áreket etý durys emes dep esepteımiz. Osyǵan baılanysty Q.Amanjolov kóshesi, 32-úı turǵyndarynyń qaýipsizdigin qamtamasyz etip, halyqtyń ıgiligine baǵyttalǵan naqty ári ádil sheshim qabyldaýlaryńyzdy suraımyz. Sondyqtan máseleni sozbaı, shuǵyl túrde nazarǵa alyp, tıisti sharalar qabyldaý qajet, — deıdi turǵyndar.
Kazinform tilshisi osy máseleni anyqtap bilgen edi.
Atalmysh úıde turatyn Aıjan Ákimovanyń sózine qaraǵanda, qazirgi tańda 10 páterdiń ekeýi ǵana bos. Qalǵan páterlerde adamdar turyp jatyr.
— Ózim osy úıde 2022 jyldan beri turamyn, kámeletke tolmaǵan bir ul, bir qyzym bar. Úsh balaly taǵy bir otbasy, jasy toqsanǵa jýyqtaǵan ájeı turady. Saraı qulap jatyr, úıdiń jaǵdaıy da osyndaı, ábden tozǵan. Ótken jyly Oral qalasy turǵyn úı-kommýnaldyq sharýashylyǵy, jolaýshy kóligi jáne avtomobıl joldary bólimine qujattarymyzdy tapsyrdyq. Apatty jaǵdaıdaǵy úıdi súrip tastap, ornyna jańasy tezirek salynsa deımiz. Onymen qurylys salýshylar jerimizdi tarsyna ma, kirispeı tur. Áıtpese mektep, ýnıversıtet jaqyn, ornalasqan jeri qolaıly, — deıdi A.Ákimova.
Oral qalasy ákimdiginiń málimeti boıynsha atalmysh eki qabatty úı 1929 jyly salynǵan, páterler sany — 7. 2025 jyly ǵımarattyń tehnıkalyq jaı-kúıin tekserý nátıjesinde turǵyn úı apatty dep tanylǵan. Tekserý jumystaryn «Premium Group KZ» JShS atqarǵan.
— Atalǵan úı turǵyndary baspana máselesin sheshý úshin «Otbasy bank» AQ arqyly turǵyn úı kezegine tirkelýi qajet. Sonymen qatar turǵyn úıdi renovatsııa baǵdarlamasy aıasynda jańǵyrtý maqsatynda qurylys uıymyn tartý baǵytynda tıisti jumystar júrgizilip jatyr. Kúni búginge deıin Oral qalasynda 61 turǵyn úı apatty dep tanylǵan, — delingen resmı jaýapta.
Eske sala keteıik, budan buryn Oralda kópqabatty úı turǵyndary tóbeden sý ketetinin aıtyp shaǵymdanǵanyn jazǵan edik.
