Barak Obamanyń on bir dosy
ASTANA. 9 qyrkúıek. QazAqparat - Vladımır Pýtın men Barak Obama G20 sammıtiniń resmı kezdesýlerinen tysqary jerlerde de, keshki as kezinde de Sırııa máselesi boıynsha ortaq kelisimge kele almady, dep habarlady RosBıznesKonsaltıng.
AQSh prezıdenti úıine, Germanııany qosa eseptegende, 11 eldiń qoldaýyn alyp oraldy. Biraq Eýropa, Sırııany bombylamastan buryn hımııalyq qarýdy Bashar Asad úkimetiniń paıdalanǵanyna naqty kóz jetkizgisi keledi. Sarapshylardyń baıandamasy qyrkúıektiń aıaǵynda, al BUU mandatysyz bombylaý týraly AQSh kongresiniń sheshimi - jýyrda jarııalanýy múmkin.
Peterbýrgtegi G20 sammıtiniń ekonomıkalyq kún tártibi ekinshi satyǵa shegerildi. Bastapqyda bári Vladımır Pýtın men Barak Obamanyń (AQSh prezıdenti zaıybysyz ushyp keldi, biraq jeke Cadillacymen jáne G20 belgisiniń ornyna jaǵanyń qaıyrmasyna amerıkalyq baıraqty taǵypty) resmı sálemdesýiniń qalaı ótetindigin, sosyn - olardyń ne týraly jáne kimmen kelisetindigi kútildi.
Sırııa boıynsha jeke otyrysty Vladımır Pýtın Petergoftegi keshki as kezinde uıymdastyrdy. «Áriptester surady», dep túsindirdi ol. Pikirtalas túngi saǵat birge deıin jalǵasty. Osy máseleniń ashyq ári jan-jaqty talqylanýy úshin Pýtınniń barlyq jaǵdaıdy jasaǵanyn atap ótkim keledi, dep aqtaryldy Obama. Eki eldiń basshysy da ústel basynan kópshiliktiń qoldaýyn alǵandaı sezimmen kóterildi.
Pýtın Amerıkanyń odaqtasyna Túrkııany, Kanadany, Saýd Arabııasyn, Frantsııany jáne brıtandyq premer Devıd Kemerondy jatqyzdy. «Kantsler Angela Merkel de ózin óte saq ustaýda, Germanııa eshqandaı áskerı is-qımyldarǵa qatyspaıdy», dep málimdedi Pýtın qorytyndy baspasóz máslıhatynda. Reseıdiń jaqtastary retinde ol Qytaıdy, Úndistandy, Indonezııany, Argentınany, Brazılııany, OAR, Rım papasy men BUU bas hatshysy Pan Gı Mýndy atady.
BUU sanktsııasyn almaı Sırııanyń ishki isine aralasý zańsyz, dedi Pýtın. AQSh kózqarasyna qosylýǵa keıbir elderge kedergi bolyp otyrǵan jalǵyz másele osy ǵana, dep kelisti kórshi brıfıng-zaldaǵy Barak Obama. Pýtın men Obamanyń qorytyndy baspasóz máslıhaty bir jarym saǵat aıyrmashylyqpen bastalýy tıis edi, biraq Reseı prezıdenti 1 saǵat 5 mınýtqa keshigip bastady, aqyry ekeýiniń baspasózben áńgimesi bir ýaqytta ótti.
Eger BUU qaýipsizdik keńesi sharasyz bolsa, Álem qol qýsyryp qarap otyra almaıdy, Amerıka nómiri birinshi derjava retinde jaýapkershilikti óz moınyna alýǵa daıyn, dedi Obama. Asad rejıminiń hımııalyq qarý qoldanýy tek Sırııanyń tragedııasy emes, bul búkil álemge tóngen qaýip ekendigin atap ótti Barak Obama. Birer saǵattan keıin, Sırııany BUU mandatysyz bombylaý týraly AQSh málimdemesine Avstralııa, Kanada, Frantsııa, Italııa, Japonııa, Ońtústik Koreıa, Saýd Arabııasy, Ispanııa, Túrkııa, Ulybrıtanııa qol qoıǵandyǵy belgili boldy. Sammıt aıaqtalǵannan keıin oǵan Germanııa da qosyldy.
Ázirge Amerıkanyń «batyl qımylyn» tek moraldyq turǵyda qoldaý týraly áńgime bolýda. Vılnıýste Evroodaqtyń 28 eliniń syrtqy ister mınıstrleri AQSh-tyń memlekettik hatshysy Djon Kerrıge áskerı qımyldy keıinge shegere turý týraly ótinish aıtty. Obamanyń ótinishin kongress 11 qyrkúıek kúni maquldaıdy dep kútilýde. Al BUU sarapshylarynyń kimniń hımııalyq qarýdy qoldanǵanyn anyqtaıtyn baıandamasy qyrkúıektiń aıaǵynda jarııalanýy tıis.
Ázirge Shtattar keıinge shegerý máselesin tııanaqty anyqtaǵan joq. Al Bar Obama jýrnalısterge, óziniń halqyna 10 qyrkúıek kúni málimdeme jasaıtynyn habarlady. Onyń «Men soǵysty bastaý úshin emes, aıaqtaý úshin saılandym, biraq bizge qıyn tańdaýlardy jasaýǵa týra keletin sátter bolady», degen sózi amerıkandyqtardy qanshalyqty ılandyratyny belgisiz. Demalys kúnderi Nıý-Iork pen AQSh-tyń basqa da qalalarynda Sırııaǵa shabýyl jasaýǵa qarsy shyqqan sherýler bolyp ótti. Belsendilerdiń biri kóshege «Barak Obomba» degen jazýy bar ishkóılekpen shyqty.
