Barak Obama shaǵyn kásipkerlikti qoldaý týraly zańǵa qol qoıdy
ASTANA. Qyrkúıektiń 28-i. QazAqparat - AQSh Prezıdenti Barak Obama shaǵyn kásipkerlikti qoldaý týraly zańǵa qol qoıdy. Zań shaǵyn kásipkerlikti nesıeleýge 30 mlrd dollar qarjy bólýdi kózdeıdi,
dep habarlaıdy Associated Press.
B.Obamanyń pikiri boıynsha, bul shara mıllıondaǵan shaǵyn kásip ıelerin nesıemen qamtamasyz etedi jáne elde jańa jumys oryndaryn ashady.
AQSh-taǵy resmı jumyssyzdyq deńgeıi halyqtyń eńbekke jaramdy bóliginiń 9,7 paıyzyn quraıdy. Degenmen, jumys izdeýdi múldem toqtatqan nemese tolyq emes jumys kúnine kóshýge májbúrlerdi qosa eseptegende, AQSh-ta jumyssyzdyq deńgeıi áldeqaıda joǵary, birqatar ekonomısterdiń esebinshe 20 paıyzdan artyq.
B.Obama zańǵa Kongresstiń qos palatasynyń maquldaýynan keıin qol qoıdy.
