Barak Obama amerıkandyq mıllıonerlerge salyqty kóteredi
ASTANA. 19 qyrkúıek. QazAqparat - AQSh Prezıdenti Barak Obama jylyna 1 mıllıon dollardan astam kiris tabatyn amerıkandyqtarǵa salyq salý normasynyń tómengi mólsherin kóterýdi josparlaýda. Bul týraly jergilikti BAQ-qa silteme jasap RBK agenttigi habarlady.
Jýrnalısterge Aq úı basshysynyń ókili málim etkendeı, Obama óziniń salyqty kóterý jónindegi jospary jóninde 2011 jylǵy 19 qyrkúıekte AQSh kongresine bıýdjet jetispeýshiligin qysqartý joosparyn usynǵan kezde egjeı-tegjeıli aıtyp bermek.
Qurama Shtattardyń baı turǵyndary úshin salyqty kóterý ıdeıasyn belgili amerıkandyq mıllıarder Ýorren Baffet aıtqan bolatyn. Sondyqtan da ony qazir «Baffet normasy» dep atap ketti. Mıllıarder búginde zańnamada dáýletti amerıkandyqtardyń salystyrmaly túrde az tóleýge múmkindikterdi qarastyratyn kemistik bar ekenin aıtady. Onyń aıtýynsha, ınvestıtsııalyq qyzmetke salyq mólsherlemesi eńbekaqy salyǵynan tómen.
Kongreste Obamanyń jospary eleýli qarsylyq týǵyzady dep kútilýde. Ókilder palatasyna baqylaý jasaıtyn respýblıkalyq partııa salyqty arttyrýǵa úzildi-kesildi qarsylyq bildirýi múmkin.
