Barak Obama AQSh-taǵy Frantsııa elshiligine baryp, kóńil aıtty
ASTANA. QazAqparat - AQSh prezıdenti Barak Obama Charlie Hebdo jýrnaly redaktsııasyna jasalǵan lańkestik áreketti aıyptap, frantsýz halqynyń qaıǵysyna ortaq ekenin bildirý úshin Vashıngtondaǵy Frantsııa elshiligine bardy, dep habarlady VVS.
Obama Parıjde qaza bolǵandardy bir mınýt únsizdikpen eske alyp, kóńil aıtý kitabyna jazba qaldyrdy.
«Júzdegen jyldar boıy odaqtasyp, ádildik pen jalpy qundylyqtardy qorǵaýda frantsýz halqymen bir sapta kelemiz. Terrorızm erkindikke tosqaýyl bola almaıtynyn bile otyryp, bolashaqqa birge umtyla beremiz, bizdiń muratymyz - barsha álem jolyn nurlandyratyn bıik murattar. Vive la France!», - dep jazdy Barak Obama.
Charlie Hebdo satrıalyq jýrnalyna jasalǵan shabýyldan 12 adam qaza tapty.
