Barak Obama Aq úıde aýyzashar berdi
ASTANA. 13 shilde. QazAqparat - AQSh prezıdenti Barak Obama Aq úıde jyl saıyn Ramazan aıyndaǵy dástúrinen jańylmaı, musylmandarǵa aýyzashar berdi. Bul týraly muslim.kz habarlady.
Aýyzashar kezinde sóz sóılegen ol Ramazan aıynyń beıbitshilik, ádilettilik, teńdik saltanat quratyn aı ekenin aıtyp, Taıaý Shyǵys pen Soltústik Afrıkadaǵy qıyn kezeńdi tilge tıek etip, osynaý qasıetti aıda mıllıondaǵan bosqyndardyń jyraqta júrip, oraza ustaǵanyna tánti bolǵanyn jetkizdi.
Sondaı-aq, Barak Obama mıllıondaǵan amerıkalyq musylmandardyń ulttyń damýyna qosqan úlesin de sóz etti.
Ol sóziniń sońynda Amerıka jáne álem musylmandaryna beıbitshilik pen ózara túsinistik, shattyq tiledi.
Aq úıde aýyzashar berý dástúri Bıll Klıntonnyń AQSh prezıdenti bolyp turǵan kezden bastaý alady.
