BARAQ BATYR

Baraq Satybaldyuly (1743-1840) batyr, Kishi júz qazaqtarynyń ult-azattyq qozǵalysy basshylarynyń biri. Kishi júzdiń Jetirý taıpasynyń Tabyn rýynan shyqqan.

Ústirttiń Sam qumynda dúnıege kelgen.

         Baraqtyń batyr ataǵy 18 jasynda torǵaýyt batyry Alakóbikti jekpe-jekte jeńgennen keıin shyqqan.

18 ǵasyrdyń 70 jyldaryna deıin shómishti-tabyn qolyn bastap, Edil men Jaıyq arasynda qalmaqtarmen soǵysqan. 1785-1792 jyldar aralyǵynda Syrym Datuly bastaǵan Reseı otarshyldyǵyna qarsy kúres basshylarynyń qatarynda bolǵan.

         Syrymnyń jaqyn serigi Baraq batyr úsh myńdyq jasaǵymen Orynbor shebindegi qamal-bekinister boıynda jáne qazaq dalasyna jiberilgen patsha úkimetiniń jazalaýshy otrıadtarymen keskilesken shaıqastar júrgizgen. Oral áskerı raportynda Baraq batyrdyń eki myń jasaǵy úkimet áskerine qarsy turǵany jazylǵan. Baraq batyrdyń áskerı kúshi týraly baron O.Igelstromnyń ımperator Ekaterına ІІ-ge jazǵan hatynda aıtylady. Baraq batyrdyń tegeýirindi qarsylyq áreketteri orys otarshylarynyń zorlyq-zombylyǵyn shektep, Jaıyqtyń oń jaǵalaýyndaǵy qazaq jerlerin saqtap qalýǵa septigin tıgizdi. Ol Batys Qazaqstannyń otarlanýyn tejep, áskerı bekinisterdiń kóptep salynýyna jol bermegen.

          Baraqtyń esimi tabyn rýynyń uranyna aınalǵan. Onyń erlikteri «Baraq batyr» tarıhı dastanyna arqaý bolǵan.

         Baraq Satybaldyulynyń uly Asaý men nemeresi Dáýit te ataqty batyrlar bolǵan. Baraq batyr men Asaý batyr Sam qumynda Turysh aýylynan ońtústikke qaraı 15 shaqyrym jerde jerlengen. 1993 jyly Baraq batyrdyń beıitine kúmbezdi kesene turǵyzylǵan.