Baraholka bazarlarynda josparsyz tekserý júrgizilýi múmkin - Almaty TJD
ALMATY. QazAqparat - Almatynyń baraholkasyndaǵy bazarlarda josparsyz tekserý júrgizilýi múmkin. Bul týraly búgin Almaty qalalyq Tótenshe jaǵdaılar jónindegi departamentinde ótken baspasóz brıfıngi barysynda Almaty qalalyq TJD Órt qaýipsizdigi salasyndaǵy baqylaý jáne aldyn alý qyzmeti basqarmasy bastyǵynyń mindetin atqarýshy Aıdos Núsipbaev málimdedi.
«Qazir burynǵy «Olja» bazarynda bolǵan órt ornynda órt sóndirý zerthanasy jáne Almaty qalalyq ІІD qyzmetkerleri jumys istep jatyr. Órttiń shyǵý sebepterin anyqtaý úshin oǵan qatysty materıal Almaty qalalyq Іshki ister departamentine beriledi. Bul jerde órt qaýipsizdigi erejesiniń buzylýynan bastap, qasaqana órt qoıýǵa deıingi barlyq boljamdar qarastyrylatyn bolady. Eger órttiń shyǵý sebepterine qatysty, josparsyz tekserýge negiz tabylyp jasta, onda biz zań aıasynda baraholkadaǵy barlyq bazarlarda josparsyz tekserý júrgizetin bolamyz», - dedi A. Núsipbaev.
Sonymen qatar, ol «Olja» bazarynyń qazirgi tańda «Almaly» dep atalatyndyǵyn jáne onda qaıta jabdyqtalǵaly beri órt qaýipsizdigine qatysty tekserý júrgizilmegendigin jetkizdi.
«Bul bazar 2012 jyldan 2016 jyldyń alǵashqy jartyjyldyǵyna deıin «Olja» dep atalyp keldi. Ol «Qulager» JShS tıesili bolatyn. Bazar 2013 jyldyń qyrkúıek aıynan 2015 jyldyń sońyna deıin jumys istegen joq. Óıtkeni, onda qaıta qurý jumystary júrgizildi. Almaty qalalyq TJD 2016 jyldyń mamyr aıynda osy bazarda josparly tekserý sharasyn júrgizýdi josparlaǵan bolatyn. Alaıda, tekserý týraly mamyr aıynda bazar basshylyǵyna habarlama berilgen kezde, olar bizge bazardyń menshik ıesine qatysty zańdy tulǵanyń aýysqandyǵy, bazardyń endi «Shabdarbaev» Jeke kásipkerligine tıesili ekendigi jáne bazardyń «Almaly» dep atalatyndyǵy týraly anyqtama berdi. Osyǵan baılanysty, Kásipkerlik kodeksine sáıkes, bul bazarda tekserý jumystary júrgizilgen joq. Endi aldaǵy josparly tekserý sharasy 2017 jyldyń alǵashqy jyrtyjyldyǵyna josparlanatyn bolady», - dedi A. Núsipbaev. 
