«Baraholka»: 150-den astam kásipker bazar aýmaǵynan kóshti
ALMATY. KAZINFORM — Almatyda bes bazardyń jer telimderi memleket menshigine qaıtaryldy, onyń ishinde tolyqtaı abattandyrý josparlanǵan áıgili «Rahat» bazary da bar.
— Almatynyń Jetisý aýdanynda burynǵy «Rahat» bazary ornalasqan aýmaqta kórkeıtý jumystary bastaldy. «Baraholka» dep atalatyn bul bazar tıisti ruqsat qujattarsyz jumys istegen. Aýmaqty bosatý zańdy kúshine engen sot sheshimderiniń negizinde júzege asyryldy. Túsindirý jumystary júrgizilgennen keıin 150-den astam kásipker bazar aýmaǵynan kóshti. Olarǵa kórshiles bazarlardan jeńildetilgen sharttarmen balamaly saýda oryndary usynyldy, — dep jazdy Almaty ákimdiginiń baspasóz qyzmeti.
Jumys barysynda kásipkerler saýda konteınerlerin óz betinshe shyǵaryp, keıbir qurylymdardy buzdy. Qazirgi tańda bosatylǵan aýmaqta kórkeıtý jobasy ázirlenip jatyr.
Joba aıasynda bazar kelýshileri men aýdan turǵyndaryna arnalǵan kógaldandyrylǵan, jaıly qoǵamdyq keńistik pen demalys aımaqtaryn salý josparlanyp otyr. Sonymen qatar aýmaqtyń bir bóligi avtoturaq uıymdastyrýǵa paıdalanylady. Bul kólik turaqtaryn retke keltirip, aýdannyń kólik qoljetimdiligin jaqsartýǵa múmkindik beredi.
Bul jumys «Zań jáne tártip» qaǵıdatyn júzege asyrý aıasynda júrgizilip, turǵyndar men qala qonaqtaryna jaıly ári qaýipsiz qalalyq orta qalyptastyrýǵa baǵyttalǵan.
Aıta keteıik, Almatydaǵy «Baısat» bazaryna satyp alýshy taǵy tabylmady.
