Bar oıym sýǵa batyp bara jatqan balany aman alyp qalý boldy — túrkistandyq polıtseı
TÚRKІSTAN. QazAqparat – Qystygúni sýǵa batqan balany qutqarǵan túrkistandyq polıtseı Marat Nurymbetov «Erligi úshin» medalimen marapattaldy. Polıtsııa kapıtany óziniń bul áreketi erlik emes, azamattyq boryshy ekenin aıtady, dep habarlaıdy QazAqparat tilshisi.
Jetisaı APB-niń anyqtaýshysy bolyp qyzmet atqaratyn Marat Turymbetov 2 aqpanda oryn alǵan oqıǵany jadynda saqtap qalǵan. Tártip saqshysynyń aıtýynsha, «Dostyq» kanalynda bala sýǵa aǵyp bara jatyr, qutqarý kerek!!!» degen habarlamany ratsııa arqyly estigen. Sol kanalǵa jaqyn bolǵan soń, oılanbastan sol jerge jetip barǵan.
«Qasymdaǵy áriptesimmen birge kólik dabylyn qostym da, oqıǵa bolǵan aımaqqa qaraı zýlaı jóneldim. Qyzmettik kólikpen kanalǵa 3 mınýtta jettik. Qar erı bastaǵannan soń ba, kanal ishindegi sý odan saıyn arnasyna tolǵan. Kanal jaǵasyna kólikpen jetken boıda balaǵa qaraı júze jóneldim. Onda aǵys qatty, sý da ájepteýir tereń eken. Ekeýimizdi de sý túbine tartyp ketýi múmkin edi. Osyndaı jaǵdaı bolǵanda eń bolmasa balany shlangaǵa orap qutqaryp qalaıyn degen tosynnan oı týyndaǵan. Jasóspirim bala sýyq sýǵa bir batyp, bir shyǵyp, jan ushyra aıqaılap jatyr. Bar kúshimmen júzip, sanaýly sekýndtyń ishinde oǵan jettim. Balada dármen qalmaǵan, sý jutyp qoıypty. Men jetkende, qutqarylǵanyn sezdi me ol sylq tústi. Sýdyń astyna batyp bara jatqan uldyń denesin julqı tartyp, jaǵaǵa qaraı júze bastadym. Kenet jaǵaǵa jaqyndaýǵa 5 metrdeı jer qalǵanda, aıaǵymdy qaıyryp aýyrtyp aldym. Bala bolsa qolymda. Batyp ketemiz be dep edim, alaıda bir Alla jar boldy ma, boıyma qaıta kúsh jınalyp, júzýdi jalǵastyrdym. Jaǵadan áriptesterim kútip aldy», - deıdi polıtsııa kapıtany.
30 jastaǵy tártip saqshysy jaǵaǵa shyǵysymen jedel járdemdi kútpeı, balany qyzmettik kólikpen aýrýhanaǵa jetkizgen. Jolda ketip bara jatyp alǵashqy medıtsınalyq kómek kórsetip, es tússiz jatqan jasóspirimdi jasandy jolmen tynystandyrýǵa tyrysqan.
«Jetkinshek birden jansaqtaý bólimine jatqyzyldy. Al bir kúnnen soń onyń jaǵdaıy jaqsaryp, palataǵa aýystyryldy. Árıne, balanyń anasy men atasy aǵynan jarylyp alǵystaryn aıtty. Biraq men ózimdi erlik jasadym dep aıta almaımyn. Sebebi, balany qurmet kóreıin dep qutqarǵanym joq. Meniń ornymdaǵy kez kelgen adam osylaı isteıtin edi. Bar oıym balany aman alyp qalý boldy», - deıdi Marat Nurymbetov.
Polıtsııa kapıtany «adamnyń durys mamandyq tańdaýy — ómirdiń kilti ispettes» deıdi. ıAǵnı, árbir adam tańdaǵan mamandyǵymen ómir boıy birge bolady.
«Men de óz mamandyǵymdy tańdaýda qatelespedim dep oılaımyn. Polıtsııa qyzmetkeri bolý bul bala kezgi armanym bolatyn. Búgingi zaman aǵymyna saı polıtseıler halyqqa janashyr, járdemshi, qıyndyqqa tap bolǵanda kómek qolyn sozar batyl qyzmetker bolýy qajet. Qaharman ári parasatty er polıtseı retinde eldiń aýzynan túspeıtin bolýymyz kerek. Ol úshin barynsha qyzmetimizge adal, halyqtyń jaǵdaıyna qanyq bolǵanymyz jón. Sonda ǵana úlken men kishiniń alǵysyna bólenemiz», -deıdi Marat Turymbetov.
