Bári oıdan qurastyrylǵan: Sherzat isindegi basty aıyptalýshy osyǵan deıingi sózinen bas tartty

TALDYQORǴAN. KAZINFORM — Jetisý oblysynyń mamandandyrylǵan aýdanaralyq sotynda Sherzat Polattyń ólimine qatysty qylmystyq is qaralyp jatyr. Búgin basty sottalýshy Abzal Shynasyl óz jaýabyn berip, qylmys jasalǵannan keıingi jaǵdaı týraly aıtyp berdi.

Aıyptalýshynyń aıtýynsha, Qonaev qalasyna etappen jóneltý aldynda ol birneshe adammen ózara kelisken.

— Qonaevqa etappen keter kezde Ravıl Sakıev, Belǵojaev jáne Azamat Toqtaýbaev úsheýmiz aldyn ala kelisimge keldik. Sakıev «muny bir adam moınyna alsyn, áıtpese bárimizge qıyn bolady» dedi. Sol sátte men pyshaq qoldanǵan adam retinde qylmysty jasyryp júrgendeı bolmaý úshin ishteı oılanyp, Sherzattyń ólimin moınyma aldym, — dedi Abzal.

Onyń aıtýynsha, bastapqy kelisim boıynsha, Nurqanattyń jambasynan tabylǵan pyshaqty Shyńǵys óz moınyna alady dep kelisken.

— Tergeý barysynda biz osy kelisim boıynsha jaýap berdik, — dedi sottalýshy.

Sottalýshynyń sózine sensek, 2024 jyldyń 16 qazanynan beri bergen jaýaptarynyń bári oıdan qurastyrylǵan.

Munyń aldynda Abzal Shynasyl Nurqanat Ǵaıypbaevty úsh jerinen pyshaqtaǵanyn aıtqan bolatyn. 

Eske sala keteıik, Sherzat Polattyń ólimine qatysty 16 mamyrdaǵy sotta taǵy bir sottalýshy aıyptaý aktisimen kelispeıtinin aıtqan.

Nurqııas Іlııasov myltyqpen urý sebebin túsindirse, Azamat Toqtaýbaev ótirik aıǵaq bergenin rastady.

Kámeletke tolmaǵan taǵy bir aıyptalýshy Dýman Ysqaq ózine taǵylǵan aıypty moıyndamady.

Aıta keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasóspirim qaza bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzattyń aǵasy Nurqanat Ǵaıypbaevtyń denesi tabyldy.