«Bári qaıta bastalady»: Jánibek Álimhanuly AQSh-qa barýǵa daıyndalyp jatyr
ASTANA. KAZINFORM — Qazaqstandyq boksshy, álem chempıony Jánibek Álimhanuly jýyrda AQSh-qa baryp, aldaǵy jekpe-jekterine daıyndyqty jalǵastyrýdy josparlap otyr. Bul týraly sportshynyń komandasy Instagram paraqshasynda habarlady.
— Bári qaıta bastalady. Bastamamyz sátti bolǵan sııaqty. Qurmetti jankúıerler, qoldaýlaryńyzǵa kóp raqmet! Jerlesterińiz retinde maǵan erekshe demeý kórsetip kelesizder. Qazir vızany kútip otyrmyz. Eger bári oıdaǵydaı bolsa, jaqyn kúnderi Amerıkaǵa attanamyz, — delingen habarlamada.
Buǵan deıin Jánibek Álimhanuly jańa salmaq dárejesinde WBO reıtınginde jekpe-jeksiz-aq ekinshi orynǵa kóterilgeni habarlanǵan bolatyn.
Álimhanuly sońǵy jekpe-jegin 2025 jylǵy 5 sáýirde Astanada ótkizip, frantsııalyq Anaýel Ngamıssengeni nokaýtpen jeńdi. Sol kezdesýde ol orta salmaqtaǵy WBO jáne IBF chempıondyq belbeýlerin sátti qorǵaǵan edi.
Keıin orta salmaqtaǵy WBA chempıonymen ótetin biriktirý jekpe-jegi qarsańynda qarsylasynyń dopıng synamasy oń nátıje kórsetip, kezdesý ótpeı qaldy. Qarsylasy 2026 jyldyń jeltoqsanyna deıin sporttan shettetilip, IBF tıtýlynan aıyryldy. Al Jánibektiń WBO chempıondyq belbeýi ózinde saqtalyp qaldy.
Osyǵan deıin Jánibek Álimhanuly álem chempıony ataǵynan óz erkimen bas tartqan bolatyn.
