Bar bilimim men tájirıbemdi Memleket basshysy qoıǵan mindetterdi oryndaýǵa jumsaımyn - Q.Bıshimbaev

ASTANA. QazAqparat - QR Premer-Mınıstri Kárim Másimov Ulttyq ekonomıka mınıstrliginiń ujymyna jańa mınıstr - Qýandyq Bıshimbaevty tanystyrdy, dep habarlady primeminister.kz.

«Memleket basshysynyń Jarlyǵymen Bıshimbaev Qýandyq Ýálıhanuly ulttyq ekonomıka mınıstri bolyp taǵaıyndaldy», - dedi Kárim Másimov.

Vedomstvonyń burynǵy basshysy Erbolat Dosaev Memleket basshysyna Úkimettegi eńbek jolynda senim bildirgeni úshin rızashylyǵyn aıtty.

«Sondaı-aq ujymǵa birlesken jumysy úshin alǵys aıtqym keledi. Bul men úshin úlken abyroı. Ulttyq ekonomıka mınıstrligine jáne qazir jasap jatqan jumystaryńyzda úlken jaýapkershilik artylǵan dep esepteımin», - dedi áriptesterine zor densaýlyq pen tabystar tilegen E.Dosaev.

Óz kezeginde Q.Bıshimbaev «Ulttyq ekonomıka mınıstrligi Úkimet quramyndaǵy basty vedomstvo bolyp tabylady, sondyqtan men bar bilimim men tájirıbemdi Mınıstrlik ujymymen birge Memleket basshysy qoıǵan mindetterdi oryndaýǵa baǵyttaımyn», - dep basa aıtty.