Bári baıaǵydan sybyrlap aıtyp júrgen jaıttar talqylandy — sarapshy Vashıngtondaǵy kezdesý jaıynda
ASTANA. KAZINFORM — Vashıngtonda Donald Tramp, Vladımır Zelenskıı jáne eýropalyq kóshbasshylar qatysqan kelissózder aıaqtaldy. Osy oraıda saıasattanýshy Ádil Seıfýllın kezdesýdiń negizgi qorytyndylaryna qaatysty pikirin Kazinform tilshisine bildirdi.
— Donald Tramptyń Vladımır Zelenskıımen jáne Eýropa kóshbasshylarymen kelissózderi sońǵy ýaqyttaǵy Ýkraına tóńiregindegi ahýaldy túzetýge baǵyttalǵan eń tanymal áreket desek bolady. Aq úıde bári baıaǵydan sybyrlap aıtyp júrgen «Ýkraınany NATO kirgizbeı-aq jáne isti AQSh pen Reseıdiń betpe-bet qaqtyǵysyna jol bermeı qalaı qorǵaýǵa bolady» degen syndy jaıttar talqylandy, — dep atap ótedi sarapshy.
Onyń aıtýynsha, Tramp Vashıngton kómektesýge daıyn ekenin ańǵartty, biraq ózine tán mánerde «naqty málimetterdi bulyńǵyrlatyp» jiberdi.
— Ol Ýkraınany «óte jaqsy qorǵaýǵa» ýáde berdi. Biraq bul sózderdiń astarynda ne jatqanyn naqtylamady. Al Eýropa bolsa bul máselege naqtyraq qarady: kóshbasshylar qarý-jaraq jetkizý, qarjylandyrý, tipti bitimger kontıngenti týraly máseleni qarastyrýy múmkin «nıettester koalıtsııasyn» qurý týraly aıtty. Mańyzdy jaıt: barlyq tarap Reseıge aýmaqtyq sheginis jasaý máselesi talqylanbaıtynyn atap ótti. Zelenskıı eldiń tutastyǵy máselesinde berik ustanymda jáne bul joly ony Vashıngton da, Brıýssel de qoldady, — deıdi Ádil Seıfýllın.
Onyń paıymynsha, eń qyzyqty jaıt — Tramp apat ótken aldaǵy ýaqytta bolýy yqtımal Zelenskıı men Pýtın kezdesýi.
— Ázirshe, Máskeý únsiz. Biraq, mundaı ıshara faktisiniń ózi dıplomatııalyq esiktiń ashylǵanyn bildiredi. Qorytyndylaı aıtar bolsaq, bul kelissózder daıyn beıbit jospar ákelmese de, jańa baǵytty kórsetti: AQSh pen Eýropa Ýkraınany NATO-ǵa resmı múshe etpeı-aq, ony qoldaýdyń ıkemdirek tetigin izdep jatyr. Bul jaǵdaıdy báseńdetýge jasalǵan qadam bolýy múmkin. Degenmen, soǵysty naqty toqtatý joly áli de bolsa tym alysta, — dep túıindedi oıyn saıasattanýshy.
Buǵan deıin Fox News telearnasyna suhbat bergen AQSh prezıdenti Donald Tramp Qyrymnyń Ýkraınaǵa qaıtarylýy, al Ýkraınanyń NATO-ǵa kirýi múmkin emes ekenin aıtqan bolatyn.