BAPOR: Gaza sektoryndaǵy gýmanıtarlyq kómek taýsyldy, ashtyq kúsheıip barady
ASTANA. KAZINFORM — Shamamen 3 myń gýmanıtarlyq kómek tıelgen júk kóligi shekaralardyń jabyq bolýyna baılanysty aımaqqa kire almaı otyr, dep jazdy Anadoly agenttigi.
BUU-nyń Palestına bosqyndaryna kómek kórsetý jáne jumys uıymdastyrý jónindegi Taıaý Shyǵys agenttigi (BAPOR) Gaza sektoryna buryn jetkizilgen gýmanıtarlyq kómektiń tolyq taýsylǵanyn, al aımaqtaǵy ashtyq jaǵdaıynyń odan ári ýshyǵyp bara jatqanyn málimdedi.
Agenttiktiń X (burynǵy Twitter) áleýmettik jelisindegi paraqshasynda jarııalanǵan málimdemede, gýmanıtarlyq kómektiń jetkizilýine basty kedergi – shekara ótkelderiniń jabyq turǵandyǵy aıtyldy. Izraıl engizgen qorshaýdyń saldarynan shamamen 3 myń gýmanıtarlyq júk kóligi Gazadaǵy turǵyndarǵa jetý úshin ruqsatty kútip tur.
– Muqtajdarǵa buryn jetkizilgen negizgi kómek qory taýsyldy. Ashtyq barǵan saıyn kúsheıip keledi, – delingen agenttik málimdemesinde.
Gýmanıtarlyq daǵdarystyń ýshyǵýy
2 naýryzdan bastap Izraıl HAMAS-pen tutqyndar almasýǵa jáne atysty toqtatýǵa qatysty 42 kúndik kelisimniń alǵashqy kezeńi aıaqtalǵannan keıin Gazaǵa gýmanıtarlyq júktiń kirýin tolyǵymen toqtatty.
2023 jyldyń 7 qazanynda bastalǵan áskerı qımyldardan beri Izraıl armııasynyń qarqyndy shabýyldary saldarynan shamamen 2 mıllıon adam – ıaǵnı sektor halqynyń basym bóligi – úılerin tastap ketýge májbúr boldy. Azamattyq ınfraqurylym men medıtsınalyq mekemeler de shabýyl astynda qalyp, bul úlken gýmanıtarlyq apatqa ákeldi.
Sý men elektr qýatynyń óshirilýi, sondaı-aq barlyq shekara ótkelderiniń jabylýy jergilikti halyqtyń jaǵdaıyn odan saıyn nasharlatty.
19 qańtardan bastap ýaqytsha atysty toqtatý rejımi engizilgenimen, 18 naýryz kúni tańerteń Izraıl armııasy shabýyldaryn qaıta jalǵastyrdy. Sol ýaqyttan beri Gazada 2 273 adam qaza tapty, olardyń basym bóligi – áıelder, balalar men qarttar. Taǵy 5 864 adam jaraqat alǵan.
Sońǵy málimetterge sáıkes, 7 qazandaǵy operatsııa bastalǵaly beri Gaza sektorynda 52 365 palestınalyq qaza taýyp, 117 905 adam jaralanǵan.
Eske sala keteıik, buǵan deıin Izraıl shabýyldarynan qaza tapqandardyń 65 paıyzy áıelder men balalar ekenin jazǵan bolatynbyz.