BAPOR Bas komıssary: Gaza úmitsizdik eline aınaldy
ASTANA.KAZINFORM — Birikken Ulttar Uıymynyń Palestına bosqyndaryna kómek kórsetý jáne jumystardy uıymdastyrý jónindegi Taıaý Shyǵys agenttiginiń (BAPOR) Bas komıssary Fılıpp Lazzarını Izraıldiń qarqyndy shabýyldary jaǵdaıynda «Gaza sektory úmitsizdik eline aınaldy» dep málimdedi, dep jazdy Anadoly.
«Bos aıyptaý sózder qorshaýdy alyp tastaýǵa, atysty toqtatýdy qalpyna keltirýge jáne adamzattan qalǵan nárseni saqtaýǵa baǵyttalǵan áreketterge aınalýy úshin qansha ýaqyt qajet? - dep atap ótti komıssar general Lazarını.
Bul týraly BAPOR-dyń X áleýmettik jelisindegi habarlamasynda aıtylǵan.
Ashtyqtyń kúsheıgenin jáne munyń ádeıi jasalyp jatqanyn atap kórsetken Lazarını: «Gaza úmitsizdik eline aınaldy» dedi.
Onyń aıtýynsha, eki mıllıon adam, negizinen áıelder men balalar, ujymdyq jazaǵa tartylyp, jaraqat alǵandar, naýqastar men qarttar medıtsınalyq preparattar men kútimnen aıyrylǵan.
Lazzarını gýmanıtarlyq uıymdardyń Gazadaǵy palestınalyqtarǵa kómek jetkizýge daıyn ekenin aıtty. BAPOR-dyń shamamen 3000 júk kóligi sektorǵa kirýdi kútip tur.
– Gýmanıtarlyq kómek saýda quraly jáne soǵys qarýy retinde paıdalanylyp otyr. Qorshaý alynýy kerek, gýmanıtarlyq kómek jetkizilýi tıis, tutqyndar bosatylýy qajet, al atysty toqtatý rejımi qalpyna keltirilýi kerek, – dedi ol.
Izraıldiń Gazadaǵy shabýyldary qaıta bastaldy
Izraıl armııasy 18 naýryzda Gazadaǵy keń aýqymdy soqqylardy qaıta bastady, bul 19 qańtardan bastap kúshine engen atysty toqtatý kelisiminen eki aı ótken soń boldy.
Sodan beri 1890 palestınalyq qaza taýyp, olardyń kópshiligi áıelder, balalar men qarttar, al 4950-den astam adam jaraqat aldy.
2023 jyldyń 7 qazanynda soǵys bastalǵannan beri Gazadaǵy qaza tapqandar sany 51 266 adamǵa jetip, taǵy 116 991 adam jaraqat aldy.
Izraıldiń jańa bitim usynystaryn qabyldaýdan bas tartýy aıasynda armııa HAMAS-qa qarsy áskerı áreketterdi kúsheıtý nıetin bildirdi. Óz kezeginde, HAMAS Izraıldi ýádelerin buzyp, deldal elderdiń kóz aldynda palestınalyq halyqqa qarsy genotsıdti qaıta bastaǵany úshin aıyptady.
Shabýyldardyń qaıta bastalýy premer-mınıstr Bınıamın Netanıahýdyń ishki saıası qadamdarymen, atap aıtqanda, ishki qaýipsizdik qyzmeti ShABAK basshysyn jumystan bosatýmen tuspa-tus keldi, bul da ızraıl qoǵamynda pikirtalastar týdyrdy.
Buǵan deıin habarlanǵandaı, Gazaǵa 50 kúnnen beri gýmanıtarlyq kómek jetkizilmeı jatyr.