BAPOR: 400 000-ǵa jýyq palestınalyq úıin tastap ketýge májbúr
ASTANA. KAZINFORM – Uıym atysty toqtatý rejımin dereý qalpyna keltirýge jáne Gazaǵa gýmanıtarlyq kómek jetkizýge shaqyrady, dep jazdy Anadoly.
Naýryzdyń 18-i kúni Izraıldiń Gaza sektoryna shabýyldaryn qaıta bastaǵannan keıin 400 myńdaı adam úılerin tastap ketýge májbúr boldy. Bul týraly Birikken Ulttar Uıymynyń Taıaý Shyǵystaǵy Palestınalyq bosqyndarǵa kómek kórsetý jáne jumys jónindegi agenttigi (UNRWA) habarlady.
Qujatta Gazada turatyn palestınalyqtar soǵys bastalǵaly gýmanıtarlyq ári saýda túrinde jetkiziletin kómekten uzaq ýaqyt qol úzip qalǵany basa aıtylady.
Uıym atysty shuǵyl túrde toqtatyp, ızraıldik tutqyndardy bosatýdy sondaı-aq gýmanıtarlyq kómek pen kommertsııalyq taýarlardyń Gazaǵa kedergisiz jetkizilýin talap etti.
BUU Gýmanıtarlyq máselelerdi úılestirý basqarmasynyń sońǵy baıandamasyna sáıkes, Izraıl áskerı áreketterin qaıta bastaǵannan keıin, Gaza sektoryndaǵy aýmaqtyń 65%-i palestındikter úshin jabyq aımaq retinde jarııalandy.
Derekterge súıensek, sý men elektr energııasynyń isten shyǵýy, sondaı-aq shekara ótý núkteleriniń buǵattalýy palestındikterdiń onsyzda aýyr jaǵdaıyn burynǵydan da nasharlatty.
19 qańtardan beri kúshine engen atysty toqtatý kelisiminen keıin Izraıl armııasy 18 naýryzda Gazada qarýly qaqtyǵystardy qaıtadan kúsheıtti.
Shabýyldar qaıta bastalǵaly 1522 adam kóz jumdy. Olardyń kóbi áıelder, balalar men qarttar, al taǵy 3834 adam jaraqat aldy.
2023 jyldyń 7 qazanynan bastap Izraıldiń Gazada júrgizgen shabýyly kesirinen qaza tapqandar sany 50 886 adamǵa jetip, jaraqat alǵandar sany 115 875-ke ósti.
Aıta keteıik, Izraıldegi oqytýshylar men áskerı dárigerler Gazadaǵy shabýyldardy toqtatýǵa úndedi.