Bapkerlerim jeńiske degen jigerimdi janydy – Orazbek Asylqulov

ASTANA. KAZINFORM – World Boxing aıasyndaǵy ótken týrnırde 2026 jylǵy Azııa chempıony atanǵan Orazbek Asylqulov (60 keli) altyn júldesi jóninde pikirin bildirdi.

Otandasymyz Mońǵolııa astanasy Ulanbatyr qalasynda ótip jatqan qurlyqtyq dodada úndistandyq Sachın Sachınti 3:2 esebimen jeńdi. 

– Jekpe-jek men úshin ońaıǵa túsken joq. Alǵashqy raýndta qarsylasyma ese jiberdim. Odan keıin bapkerlerim aqyl-keńesin berdi. Nátıjesinde ekinshi raýndta basymdyq tanyttym. Osylaısha bapkerlerim jeńiske degen jigerimdi janydy. Qurlyqtyq dodaǵa úlken daıyndyqpen keldik. Endigi kezekte qurama sapyndaǵy basqa da boksshylar jeńis tuǵyrynan kórinedi degen oıdamyn. Jalpykomandalyq esepte birinshi orynǵa talasaýǵa bar kúshimizdi salamyz degen oıdamyn, - dedi Orazbek Asylqulov.

Osyǵan deıin qazaqstandyq boksshy irikteý kezeńinde fılıppındik Pol Djýlıfer Baskondy jeńse, shırek fınalda japonııalyq Shýnsýke Kıtamoto sharshy alańǵa shyǵýǵa bas tartýyna baılanysty otandasymyz jarystyń kelesi satysyna ótti. Jartylaı fınalda Orazbek ózbekstandyq Abdýrahmon Mahmýdjonovty qapy qaldyrdy. 

Aıta ketsek, el quramasynan budan buryn Sabyrjan Aqqalyqov (75 keli) ózbekstandyq Javohır Abdýrahımovty jeńip, jeńis tuǵyryna kóterildi. Sondaı-aq Tórehan Sabyrhan (70 keli) ıordanııalyq ıordanııalyq Zeıad Ishaıshke ese jiberip, kúmis júldeni qanaǵat tutty.