Bapker isi: Qyzylordada jasóspirimdi zorlaý isi boıynsha tyń derekter belgili boldy
QYZYLORDA. KAZINFORM — Qyzylorda oblysy Syrdarııa aýdanynyń prokýratýrasy jasóspirimdi zorlady degen kúdikpen ustalǵan bapkerdiń 2024 jyly qyzmetten bosatylǵany týraly oblystyq dene shynyqtyrý jáne sport basqarmasynyń málimdemesin joqqa shyǵardy.
Kazinform agenttiginiń tilshisi qadaǵalaýshy organǵa Tereńózek kentiniń turǵynyna qatysty Qylmystyq kodekstiń 120-baby boıynsha tirkelgen qylmystyq is jóninde suraý joldady.
— Kúdikti «Qyzylorda oblysynyń mádenıet jáne sport basqarmasynyń «Qaısar» oıyn túrleri boıynsha sport klýby» KMQK 04.01.2023 jylǵy buıryǵymen jattyqtyrýshy bolyp qabyldanyp, 18.09.2025 jylǵy buıryǵymen jumystan bosatylǵan. «Ol 2024 jyly jumystan bosatyldy» degen ýáj negizsiz, — delingen habarlamada.
Tergeý organy Qyzylorda oblysynyń ákimdigine Qylmystyq-protsestik kodekstiń 200-babymen usynys bergen. Prokýratýra istiń zańdylyǵyn qadaǵalaý, obektıvtiligin qamtamasyz etý erekshe baqylaýda ekenin atap ótti. Sondaı-aq otbasy múshelerine qatysty qylmystyq istiń mán-jaıyn naqtylady.
— Tergeý barysynda kámeletke tolmaǵan jábirlenýshiniń otbasy músheleri men tanystary kúdiktilerdi urlap, olarǵa ózinshe bılik etip, uryp-soqqany anyqtaldy. Osyǵan baılanysty Qyzylorda oblysynyń polıtsııa departamenti Qylmystyq kodekstiń 389-babynyń 3-bóligi, 125-baby 2-bóliginiń 1, 3-tarmaqtarymen qylmystyq ister tirkeldi. Sotqa deıingi tergep-tekserý áreketi júrip jatyr. Іs boıynsha 4 kúdikti qamaýǵa alynsa, 2 kúdiktige qatysty úıqamaq túrindegi bultartpaý sharasy qoldanylǵan, — dep málimdedi aýdandyq prokýratýra.
Qylmystyq isti tergeý barysynda basqa da tulǵalardyń áreketinde Qylmystyq kodekstiń 122-babynda kózdelgen qylmystyq quqyqbuzýshylyq belgileri anyqtalǵan. Oblystyq polıtsııa departamenti Qylmystyq kodekstiń 122-babynyń 1-bóligimen isterdi tirkep, sotqa deıin tergep-tekserýge kirisken. Qadaǵalaýshy organ osynyń nátıjesine qaraı tıisti zańdy protsestik sheshim qabyldanatynyn jetkizdi.
Buǵan deıin jábirlenýshi Kazinform tilshisimen suhbattasqan kezde tergeýshiler is materıaldarymen tanysýǵa múmkindik bermegenin, oqymaı-aq qol qoıdyryp alǵanyn aıtty. Biraq prokýratýra muny joqqa shyǵaryp otyr.
— Іs boıynsha jábirlenýshiniń zańdy ókili jáne jábirlenýshiniń ókili is materıaldarymen tolyq tanysqan. Ózderiniń qoltańbalaryn qoıdyryp, is qujattarynyń kóshirmesin alǵan. Qazirgi ýaqytta is Qylmystyq protsestik kodekstiń 302-babynyń talaptaryna sáıkes qosymsha tergeý júrgizý úshin Qyzylorda oblysynyń polıtsııa departamentine joldandy, — delingen habarlamada.
Eske salaıyq, jábirlenýshi tarap Memleket basshysy men quqyq qorǵaý organdarynan isti erekshe baqylaýǵa alyp, barlyq mán-jaıǵa quqyqtyq baǵa berýdi surady. Sonymen qatar otbasy ózderine qatysty qozǵalǵan ister boıynsha da zańsyzdyqqa jol berilmeýin jáne kinási dáleldenbegen adamdardyń quqyqtarynyń saqtalýyn talap etti.
