Bapker eki jyl zorlap kelgen: Qyzylordalyq jasóspirimniń otbasy istiń ádil tergelýin suraıdy
QYZYLORDA. KAZINFORM – Buǵan deıin «hokkeı jattyqtyrýshysy zorlap, qysym kórsetti» dep málimdeme jasaǵan qyzylordalyq jasóspirim Kazinform tilshisine mán-jaıdy baıandap berdi. Jábirlenýshi men onyń týystary kúdiktiniń eki jylǵa jýyq ýaqyt boıy qorqytyp, kúsh kórsetip, bopsalaǵanyn aıtyp, istiń jan-jaqty ári ádil tergelýin talap etti.
Syrdarııa aýdany Tereńózek kentiniń kámeletke tolmaǵan turǵyny kógaldaǵy hokkeımen 2021 jyldan, ıaǵnı besinshi synyptan bastap aınalysqan.
2023 jyly jalaqy alatyn sportshy retinde sport klýbyna qabyldanyp, jattyqtyrýshysy aýysqan. Jańa bapkeriniń uıat tirligi 2024 jyly Taldyqorǵan qalasyna jarysqa barǵanda bastalǵan.
— Azııa chempıonaty ótti, biraq oǵan qatyspadyq. Bizdi kórermen retinde apardy. Barǵandardyń arasyndaǵy jasy kishisi men edim. Sportshylar jasyna qaraı toptasyp júredi jáne olar ózgeni ortasyna qospaıdy. Jarysqa barǵan kezde de úlkender jaǵy meni shettetti. Jaldamaly páterde birge turǵanymyzben keshke qaraı olar kóshege shyǵyp ketip, men jalǵyz qaldym. Sol aralyqta jattyqtyrýshy «qyzdarǵa» dep sýsyn ákeldi. Alaıda páterde eshkim bolmaǵandyqtan maǵan quıyp berdi de, qalǵanyn tońazytqyshqa qoıyp, ózi ketip qaldy. Ony ishkennen keıin ne bolǵanyn bilmeımin. Tańǵa taıaý oıanǵanymda qasymda aǵaı jatty. Men jalańash ekenmin. Qan bolyp turdym. Aǵaıdan «ne istedińiz, ne boldy?» dep suraǵanymda «ne istegenimdi bilip tursyń» dep kózin jumyp jatyp qaldy. Qoryqqanymnan basqa bólmege ketip qaldym. Aýylǵa oralǵan kezde sol jaǵdaıdy kameraǵa túsirip alǵanyn, bireýge tis jarsam, sony taratatynyn aıtyp, «qarabet qylamyn, áýletińmen qurtamyn» dep qorqytty, — dedi jábirlenýshi.
Jábirlenýshi bul jaǵdaıdan keıin de qysym toqtamaǵanyn jetkizdi. Kúdikti Tarazdaǵy jarystardyń birinde qurbysy ekeýin óz bólmesine ornalastyrǵan. Ońashada esirtki bergen, ári qaraı ne bolǵany esinde joq.
— Bir joly Tereńózek kentindegi bos turǵan úıge apardy, ol kezde mas bolatyn. Urysyp, túgel sheshindirip, qabyrǵaǵa taqap uryp-soqty. Pyshaq taqap qorqytyp, onysyn jambasyma suǵyp aldy. Qurbyma beıneqońyraý arqyly habarlasyp, dármensiz kúıimdi kórsetti. Aýzymnan qan aǵyp turǵan, denem, bet-aýzym kógerip qalǵan edi. Maýsym aıynda Taldyqorǵanda taǵy jarys boldy. Jalǵyz ózimdi kóligimen alyp ketti. Qalǵan qyzdar avtobýspen bardy. Jol boıy uryp-soǵýmen boldy. Kózimniń jartysy qyzaryp ketti, esirtki usyndy. Qarsylasqanyma qaramastan oń jaq tizeme qaıshy suǵyp aldy. Páterge kelgennen keıin taǵy da erkimnen tys jynystyq qatynasqa tartty, — dep eske aldy ol.
Keıin jábirlenýshi komanda quramynan shyǵarylǵan. Alaıda, birneshe kúnnen soń qaıtadan jattyǵýǵa kelýin talap etip, kelmegen jaǵdaıda buryn túsirilgen beınematerıaldardy taratatynyn aıtyp qorqytqan.
— Jattyqtyrýshynyń áıeli anama «kúıeýim qyzyńyzben júrip júr» dep habarlasqan. Osydan keıin anam, tátem úsheýmiz onyń úıine bardyq. Kele jatqanymyzdy bilip aǵaı qashyp ketken. Áıeli basqa qalaǵa ketipti, úıinde anasy ǵana bar eken. «Jalǵyz ulymdy sottatpańdar» dep jylap, jalyndy. «Áıelimen ajyrasyp jatyr, bul ekeýin qosaıyq» dep anamdy kóndirdi. Sol ýaqytta jattyqtyrýshy kelip, meni kenttegi álgi bos turǵan úıge julqylap alyp ketti. Telefonymdy alyp qoıyp, meniń atymnan anama «onyń ústinen aryz jazbańdar, men ony jaqsy kóremin, áıtpese ólemin» dep habarlama jiberdi. Al maǵan «joǵaryda aǵalarym bar, báribir eshteńe isteı almaısyńdar, ózderińdi túrmege, seni kolonııaǵa qamatamyn» dedi. Meni ólimge qımaǵan anam amalsyz aıtqanyna kelisti. Qyrkúıek aıynda «kámeletke tolmaǵan qyzben jaqyndasty» degen sebeppen bapkerlikten bosatyldy. Soǵan qaramastan keıin meni «qarsylas komandanyń quramynda oınaısyń» dep Taraz qalasyna jarysqa apardy. Sol joly ekeýmiz bir páter jaldadyq. Keshkisin syrtta júrgenimde shashymnan julqylap, súıreı jóneldi. Qansha shyńǵyrsam da eshkim kómekke kelgen joq. «Saǵan eshkim kómektespeıdi, beıshara» dep, páterge ákep uryp-soǵýyn jalǵastyrdy. Áıelinen bólek ketken kezde qaladan páter jaldap turdy. Turatyn jeri bolmaǵandyqtan anasy úı satyp áperdi. Baıqaýsyzda telefonynan qaryndasynyń «qyzdy ózińmen birge turǵyz, on altyǵa tolǵasyn qosamyz» degen habarlamasyn kózim shaldy. Onyń úıinde ekeýmiz turyp jatqanymyzdy úlken tátem men anamnan basqa eshkim bilmedi, — dedi jábirlenýshi.
Kúdikti jasóspirimniń tánin tanystaryna saýdalap, sol úshin esirtki men aqsha alyp otyrǵan kórinedi. Týystary bul jaǵdaıǵa basqa adamdardyń da qatysy baryna senimdi jáne olardyń áreketine quqyqtyq baǵa berilýin suraıdy.
Jábirlenýshiniń otbasy bul jaǵdaıdan habardar bolǵannan keıin quqyq qorǵaý organdaryna júgingen. Alaıda quqyq qorǵaý organdary otbasy múshelerine qatysty da qylmystyq is qozǵaǵan.
— Biz shaǵymdanǵannan keıin qarsy tarap bizdiń ústimizden aryzdanǵan. Sińlimdi qorǵaýǵa tyrysqan anam men inime esh jazyǵy bolmasa da «adam urlyǵy» jáne «óz betinshe jazalaý» baptarymen is qozǵaldy. Áýelgide qamap tastady, keıin úıqamaqqa aýystyrdy. Іnim ol kezde kámeletke tolmaǵan, kolledjde oqıdy. Taksı júrgizýshisi men taǵy bir azamatqa qatysty da shara qoldanyldy. Biraq olardyń eshqandaı jazyǵy joq. Biri qyzyn, ekinshisi qaryndasyn qorǵaǵannan basqa eshteńe istemedi, — deıdi ápkesi.
Jábirlenýshiniń týystary kúdikti taraptyń «úı, aqsha talap etti» degen ýájin joqqa shyǵaryp, páter aqysy men basqa da tólemderge qatysty chekterdiń tergeýge usynylǵanyn atap ótti.
Ápkesiniń aıtýynsha, sińlisi jarystardan kelgen saıyn denesinde jaraqat belgileri baıqalǵan.
— «Ne boldy?» dep surasaq, «dop tıdi» nemese «shalynyp quladym» dep qutylatyn. Keıde jarasy jazylǵanǵa deıin úıge kelmeı ketetin. Aǵaıyna senip tapsyrǵandyqtan esh kúmánimiz bolǵan joq. Sińlim bastapqyda sotta qoryqqanynan shyndyqtan jaltardy. Dálelimiz bolmaǵandyqtan biz de der kezinde aryzdana almadyq, — dedi ol.
Jábirlenýshi shydamy taýsylǵan soń bıyl 3 aqpan kúni bolǵan jaǵdaıdy otbasyna baıandap bergen. Alaıda osydan keıin de kúdikti qyzdyń úıiniń mańyn torýyldap, mazasyn alýdy jalǵastyrǵan. Jasóspirim oǵan esirtki ákelip bermegeni, basqa er adammen jynystyq qatynasqa túsý týraly talabyn oryndaýdan bas tartqany úshin qysym kórgenin baıandady. Suhbat barysynda osyndaı áreketke talaı ret májbúrlegeni belgili boldy.
Jábirlenýshi tergeýshiler is materıaldarymen tanysýǵa múmkindik bermegenin, oqymaı-aq qol qoıdyryp alǵanyn alǵa tartty. Endi ózi de, otbasy da istiń sozylyp ketkenine alańdap otyr.
Bul jaǵdaı jasóspirimniń oqýyna da áser etken. Sabaqqa barýǵa qoryqqandyqtan kolledj basshylyǵyna onlaın oqýǵa múmkindik berýdi suraǵan.
— Sińlimniń psıhologııalyq jaǵdaıy óte aýyr. Sabaqqa barǵysy kelmeıdi. Biz ony jalǵyz qaldyrýǵa qorqamyz. Oqý orny oqýdan shyǵaryp jibere me degen qaýip bar. Іs aıaqtalǵansha onyń qaýipsizdigi qamtamasyz etilse deımiz, — dedi jasóspirimniń ápkesi.
Ol otbasyna qysym jasalyp jatqanyn da jasyrmady. Týystarynyń aıtýynsha, kúdikti taraptyń ókilderi aryzdan bas tartýdy surap, baspana men aqsha usynǵan. Biraq olar mundaı usynystan bas tartqan.
— Bul jerde bir qyzdyń ómiri qor bolyp, bir otbasynyń shyrqy buzyldy. Kúdiktilerden qolymen istegenin moınymen kóterýin talap etemiz. Aram jolmen kelgen aqsha da, úı de bizge kerek emes. Biz zań aıasynda ádil sheshim shyǵarylǵanyn qalaımyz. Sińlimniń ǵana emes, basqa da qyzdardyń qaýipsizdigi alańdatady, — dedi jasóspirimniń týysy.
Qyzylorda oblystyq dene shynyqtyrý jáne sport basqarmasy buǵan deıin kúdiktiniń bapkerlik qyzmetpen áldeqashan qoshtasqanyn málimdegen bolatyn.
— Atalǵan is boıynsha bul azamat osydan 2 jyl buryn, ıaǵnı 2024 jyly basqarmaǵa qarasty sport mekemesindegi kógaldaǵy hokkeı jattyqtyrýshysy laýazymynan tolyǵymen bosatylǵan. Qazirgi ýaqytta ol sport salasy mekemelerinde qyzmet atqarmaıdy, — delingen habarlamada.
Jábirlenýshi tarap munyń shyndyqqa janaspaıtynyn, kúdiktiniń 2025 jyly da jarysqa barǵanyn dáleldeıtin materıaldar bar ekenin alǵa tartty.
QR Іshki ister mınıstrligi atalǵan fakt boıynsha tergeý jalǵasyp jatqanyn atap ótti.
— 2026 jylǵy 5 mamyr kúni jyly Qazaqstan Respýblıkasy Qylmystyq kodeksiniń 120-baby 3-2-bóliginiń 3-tarmaǵy boıynsha qylmystyq is tirkeldi. Atalǵan derek boıynsha tergeý júrip jatyr. Qazaqstan Respýblıkasy Qylmystyq protsestik kodeksiniń 201-babynyń talaptaryna sáıkes sotqa deıingi tergep-tekserý derekteri jarııa etilmeýi tıis, — delingen mınıstrliktiń habarlamasynda.
Jábirlenýshi tarap Memleket basshysy men quqyq qorǵaý organdarynan isti erekshe baqylaýǵa alyp, barlyq mán-jaıǵa quqyqtyq baǵa berýdi suraıdy. Sonymen qatar otbasy ózderine qatysty qozǵalǵan ister boıynsha da zańsyzdyqqa jol berilmeýin jáne kinási dáleldenbegen adamdardyń quqyqtarynyń saqtalýyn talap etedi.
Buryn habarlaǵanymyzdaı, bul is oblystyq polıtsııa departament basshylyǵynyń erekshe baqylaýynda.
