Banktik shot qaı kezde baqylanady
QYZYLORDA. KAZINFORM - 1 qańtarda Qazaqstanda jańartylǵan Salyq kodeksi kúshine enedi. Ondaǵy ózgeristerdiń biri jeke tulǵalardyń banktik shottary boıynsha júrgiziletin operatsııalarǵa qatysty. Jańa talaptyń qalaı júzege asyrylatynyn Qyzylorda oblysy boıynsha memlekettik kirister departamenti basshysynyń orynbasary Asqar Elemanov tarqatyp aıtyp berdi.
- Buǵan deıin jeke tulǵalardyń shottary boıynsha tek aýdarymdar sany eskeriletin. Úsh aı qatarynan 100 jáne odan da kóp ártúrli tulǵadan qarajat túsken jaǵdaıda ǵana kásipkerliktiń tabys belgileri boıynsha tekserý júrgiziletin. Endi jeke tulǵanyń kásipkerlikke arnalmaǵan shotyna úsh aı qatarynan ár aıda 100 túrli adamnan qarajat túsip, onyń jalpy somasy eń tómengi jalaqynyń 12 eselengen mólsherinen assa, mundaı operatsııalar kásipkerlik qyzmetten alynǵan tabys retinde qarastyrylady. Eń tómengi jalaqy mólsheri 85 myń teńge ekenin eskersek, jalpy soma 1 020 myń teńge shamasynda degen sóz. Eger azamat óz shotyna túsken qarajattyń kásipkerlik qyzmetke qatysy joq ekenin dáleldeı alsa, kásipker retinde tirkelý mindeti týyndamaıdy. Al dáleldemeler usynylmaǵan jaǵdaıda zańnama talaptaryna sáıkes kásipker retinde tirkelýine týra keledi, - dedi ol.
Salyq salasynyń ókili osy oraıda azamattardy kásipkerlik qyzmetke arnalǵan jeke shotty paıdalanýǵa shaqyrdy.
Buǵan deıin salyq salasynyń sarapshysy Oljas Otar jańa salyq kodeksindegi normalardy egjeı-tegjeıli tarqatqan edi.