Banktik portfelderdi «nashar» nesıeden aryltý isin aıaqtaý qajet - N.Nazarbaev
«Banktik portfelderdi «nashar» nesıeden aryltý isin aıaqtaý qajet. Ol úshin bank ıeleri shyǵyndaryn moıyndaı otyryp, ekonomıkalyq jaýapkershilik alýǵa tıis. Aktsıonerlerdiń affılırlengen kompanııalar men jeke adamdardyń paıdasy úshin bankterden qarjy shyǵarýy aýyr qylmys bolyp sanalýǵa tıis. Ulttyq Bank mundaı isterge nemquraıly qaramaý kerek. Áıtpese, mundaı memlekettik organnyń ne keregi bar? Ulttyq Bank tarapynan qarjy ınstıtýttarynyń qyzmetin qadaǵalaý qatań, ýaqtyly ári nátıjeli bolýǵa tıis», - dedi Elbasy Joldaýynda.
Sonymen qatar Qazaqstan Prezıdenti memleket qarapaıym azamattardyń múddelerin qorǵaýǵa odan ári kepildik beretindigin basa atap ótedi.
«Jeke tulǵalardyń bankrottyǵy týraly zań qabyldaýdy tezdetý qajet. Sonymen qatar 2016 jyldyń 1 qańtaryna deıin halyqqa berilgen valıýtalyq ıpotekalyq zaımdar jónindegi máseleni Ulttyq Bankke tolyǵymen sheshýdi tapsyramyn. Sol kúnnen bastap atalǵan valıýtalyq zaımdardy jeke tulǵalarǵa berýge zań júzinde tyıym salynǵan bolatyn. Ulttyq Bank pen Úkimet ekonomıka salalaryndaǵy naqty tıimdilikti esepke alatyn stavkalarmen bızneske uzaq merzimdi nesıelendirýdi qamtamasyz etý máselesin birlesip sheshýge tıis», - dedi Elbasy.
Nursultan Nazarbaev Joldaýda ınvestıtsııalyq ahýaldyń odan ári jaqsarýy jáne qor naryǵynyń damýy mańyzdy bolyp sanalatyndyǵyna da toqtalady.
«Bul - jumysyn bastaǵan «Astana» halyqaralyq qarjy ortalyǵynyń negizgi mindetteriniń biri. Ol halyqaralyq ozyq tájirıbeni paıdalanyp, aǵylshyn quqyǵy men zamanaýı qarjy tehnologııalaryn qoldanatyn óńirlik habqa aınalýǵa tıis. «Samuryq-Qazyna» ulttyq ál-aýqat qory» ulttyq kompanııalarynyń aktsııalaryn IPO-ǵa tabysty túrde shyǵarý qor naryǵyn damytýǵa septigin tıgizedi», - dedi QR Prezıdenti.
