Bankterge jarnamada mańyzdy aqparatty usaq qarippen jazýǵa tyıym salynady
ASTANA. KAZINFORM — QR Qarjy naryǵyn retteý jáne damytý agenttigi qarjylyq ónimderdi jarnamalaýǵa qoıylatyn jańa talaptardy engizdi.
Endi bankter óz usynystarynyń qunyn, táýekelderin jáne sharttaryn tutynýshylarǵa barynsha túsinikti túrde kórsetýge, mańyzdy aqparatty usaq qarippen nemese eskertýlerdiń astyna jasyrýǵa jol bermeýi tıis. Tıisti normalar qarjylyq ónimderdi basqarýǵa qoıylatyn jańa talaptarda bekitildi.
Qujatqa sáıkes, jarnama tutynýshylardy qarjylyq ónimniń sıpattamalary, quny, tabystylyǵy men táýekelderine qatysty jańylystyrmaýy kerek. Aqparat arnaıy bilimi joq qarapaıym adam da túsine alatyndaı etip berilýi tıis.
Aýdıo jáne vızýaldy jarnamaǵa qandaı talaptar qoıylady
Mátindik jarnamada táýekelder týraly aqparat kózge anyq kórinip, oqýǵa yńǵaıly bolýy qajet. Bul talap qariptiń ólshemine jáne aqparattyń ekranda kórsetilý uzaqtyǵyna da qatysty. Aýdıojarnamada eskertýler men shekteýler tyńdaýshy olardy tolyq túsine alatyndaı qarqynmen aıtylýy tıis.
Beınerolıkterde mańyzdy aqparat kórermen ony alǵashqy kórgennen-aq túsine alatyndaı etip kórsetilýi kerek. Mańyzdy sharttardy basqa vızýaldy elementtermen jaýyp qoıýǵa nemese dybystyq áserlermen estilmeıtindeı etýge bolmaıdy.
Sondaı-aq ónimniń sharttary men sıpattamalaryn onyń artyqshylyqtaryna qaraǵanda kózge túspeıtindeı etip kórsetýge tyıym salynady. Mysaly, olardy artyqshylyqtarǵa qaraǵanda usaq qarippen jazýǵa nemese ekranda az ýaqyt kórsetýge bolmaıdy.
Jarnamada taǵy neni jasyrýǵa bolmaıdy
Sonymen qatar eger jarnamada qarjylyq ónimniń quny nemese tólem mólsheri kórsetilse, qarjy uıymy klıenttiń barlyq shyǵyny týraly tolyq aqparat berýge mindetti.
Olarǵa:
- syıaqy mólsherlemesi;
- jyldyq tıimdi syıaqy mólsherlemesi;
- tarıfter;
- komıssııalar;
- shartta kózdelgen basqa da tólemder jatady.
Budan bólek, qarjylyq ónim jarnamasynda:
• klıent belgili bir qosymsha sharttardy oryndaýy qajet bolsa, ónimdi «tegin» nemese «komıssııasyz» dep kórsetýge;
• bir komıssııanyń joqtyǵyn aıtyp, basqa tólemder týraly aqparatty jasyrýǵa;
• klıenttiń naqty alatyn tabysyn azaıtatyn komıssııalar men basqa da shyǵyndardy esepke almaı, tabystylyqty kórsetýge;
• jeńildetilgen mólsherlemeni nemese komıssııany onyń qoldanylý merzimin, ony alý sharttaryn jáne jeńildik kezeńi aıaqtalǵannan keıin qoldanylatyn standartty talaptardy kórsetpeı jarnamalaýǵa bolmaıdy.
Eger qarjy uıymy ónimniń ótken kezeńderdegi kórsetkishterin jarnamada keltirse, ol bolashaqta dál osyndaı nátıjege kepildik berilmeıtinin eskertýi tıis.
Buǵan deıin medıtsınalyq qyzmetter jarnamasyna talap qatańdaıtynyn jazǵanbyz.
