Bankterge teginnen-tegin qoldaý kórsetilmeıdi – Memleket basshysy
NUR-SULTAN. QazAqparat - Bankterdiń turaqty jumys isteýine memleket te, bıznes ókilderi de, qarapaıym salymshylar da múddeli. Sondyqtan bankterge teginnen-tegin qoldaý kórsetilmeıdi. Bul týraly «Egemen Qazaqstan» gazetine bergen suhbatynda Memleket basshysy Qasym-Jomart Toqaev aıtty, dep habarlaıdy QazAqparat.
«Bank júıesi – qarjy naryǵynyń asa mańyzdy bóligi. Bankterdiń turaqty jumys isteýine memleket te, bıznes ókilderi de, qarapaıym salymshylar da múddeli. Sondyqtan bankterge teginnen-tegin qoldaý kórsetilmeıdi. Bul – ulttyq ekonomıkany kótermeleýdiń bir joly.
Qazir bankterdiń úzdiksiz qyzmet kórsetýine múmkindik bar. Depozıtterge kepildik beretin qor da turaqty jumys isteýde. Bul ahýaldy Ulttyq bank baqylap otyr. Sondyqtan salymshylardyń qarajatyna eshqandaı qater tónip turǵan joq», - dedi Prezıdent.
Q.Toqaev atap ótkendeı, tótenshe jaǵdaı kezinde ekinshi deńgeıdegi bankter áleýmettik-ekonomıkalyq ahýaldyń turaqtanýyna óz úlesin qosty dep aıtýǵa bolady.
«Eń aldymen, bankter kásipkerlerge jáne azamattarǵa bergen nesıeni qaıtarý merzimin keıinge aýystyrdy. Naqty aıtqanda, nesıe tólemderi 3 aıǵa shegerildi. Tabysynan aıyrylǵandarǵa mundaı kómek qajet. Biraq jurtshylyq arasynda nesıeni múldem qaıtarmaımyz degen túsinik qalyptaspaýy kerek. Bul – jańsaq pikir.
Sondaı-aq Úkimettiń qatysýymen shaǵyn jáne orta bıznes ókilderine jeńildetilgen nesıe berý baǵdarlamasy ázirlendi. Eger bankter kásipkerlerge, azamattarǵa nesıe berýdi toqtatsa, ekonomıkanyń kóptegen salasy turalap qalady. Biz buǵan jol bermeımiz.
Meniń tapsyrmam boıynsha Ulttyq bank pen Qarjy naryǵyn retteý jáne damytý agenttigi qarjy júıesiniń turaqtylyǵyn saqtaý úshin qosymsha sharalar qarastyrýda», - dedi Memleket basshysy.
