Bankterge stress-testileý nátıjesi 2016 jyldyń qyrkúıeginde jarııa etiledi - D.Aqyshev
ASTANA. QazAqparat - Bankterge stress-testileý nátıjesi 2016 jyldyń qyrkúıeginde jarııa etiledi. Bul týraly búgin Úkimet otyrysynda QR Ulttyq banki tóraǵasy Danııar Aqyshev málim etti.
Ulttyq bank tarabynan qarjylyq turaqtylyqty qamtamasyz etýge baǵyttalǵan jumystar jalǵasatyn bolady. Stress-testileý júrgiziledi. Onyń nátıjesi stresstik stsenarııdi júzege asyrýda bankterdiń áleýettik shyǵyndarynyń kólemin jáne kapıtaldandyrýdiń qajetti aýqymyn baǵalaýǵa múmkindik beredi. Bul jumystyń qorytyndysy 2016 jyldyń qyrkúıeginde usynylatyn bolady»,- dedi D.Aqyshev.
Sonymen qatar ol qarjylyq turaqtylyqty qamtamasyz etý baǵytynda Ulttyq bank merzimderi boıynsha Bazel-3-ke barynsha jaqyn halyqaralyq standarttardy bir mezgilde olardyń qaıtalanatyn aǵymdaǵy normalary men lımıtterin joıa otyryp endirý esebinen retteýshi talaptardy ońtaılandyrýdy júrgizetindigin aıtty.
«Bul sharalardyń nátıjesi otandyq bankterdiń básekege qabilettiligin arttyrý bolýy tıis. Atalǵan jaıt Qazaqstannyń DSU-ǵa kirýi jáne EAEO jumys aıasyndaǵy básekelestikten jaltarýǵa múmkindik berýi qajet», - dedi ol.
D.Aqyshev óz sózinde qarjylyq turaqtylyqty qamtamasyz etý máselesi keshendi bolyp tabylatyndyǵyn, bul rette Ulttyq bank sharalaryn júzege asyrý salyqtyq qoldaý elementterimen tolyqtyrylýǵa tıis ekendigine erekshe toqtalyp ótti.
«Atap aıtqanda, bul jumys istemeıtin kredıtterdi esepten shyǵarý, keshirý nemese basqaǵa berý operatsııalaryna salyq salýǵa baılanysty. Úkimetten bizdiń bul usynystarymyzdy qoldaýlaryn suraımyz» - dedi Ulttyq bank basshysy.
