Bankterge klıent quqyqtaryn saqtaý boıynsha jańa talaptar engizildi
ASTANA. KAZINFORM – Qazaqstanda ekinshi deńgeıli bankter men sheteldik bankterdiń fılıaldarynda klıentterdiń quqyqtaryn qorǵaý jónindegi bólimsheler qurylady. Bul týraly Qarjy naryǵyn retteý jáne damytý agenttiginiń táýekelderdi basqarý jáne ishki baqylaý júıesin qalyptastyrý qaǵıdalaryna engizilgen ózgeristerge sáıkes belgili boldy.
Jańa talaptarǵa sáıkes, qaǵıdalar «Jeke tulǵalardyń quqyqtary men múddelerin saqtaý» atty jańa taraýmen tolyqtyryldy.
Klıentterdiń quqyqtary men múddeleriniń saqtalýyn qamtamasyz etý maqsatynda banktiń ózge qurylymdyq bólimshelerinen táýelsiz arnaıy bólimshe qurý mindetti júkteldi.
Mundaı bólimshelerdiń negizgi mindetteri tómendegideı:
1. Klıentterdiń quqyqtary men múddeleriniń saqtalýyn baqylaý maqsatynda bank qyzmetkerleri men agentteriniń áreketterine qarjy ónimderin baqylaý satyp alý arqyly monıtorıng júrgizý.
2. Jeke tulǵalardyń bereshekterin reetteýge qatysty nesıe sheshimderin qabyldaý tártibin kelisý.
3. Qarjy ónimderiniń sharttaryn kelisý kezinde tutynýshylar úshin táýekelderdi taldaý.
4. Qarjy ónimderin jarnamalaý jáne ilgeriletý tájirıbesin taldaý.
5. Bank nesıelik sharttaryna ózgerister engizý týraly ótinishterdi qaraý protsesteriniń tıimdiligin baǵalaý, sonymen qatar ótinishterdi qabyldaýdyń ınternet-resýrstar men mobıldi qosymsha arqyly júzege asý arnalarynyń qoljetimdiligin taldaý.
6. Bank qarjy ónimderi boıynsha ótinishterdi sandyq jáne sapalyq turǵydan taldaý arqyly:
– klıentter úshin negizgi táýekelderdi anyqtaý;
– Kórsetiletin qyzmet sapasy men ónimderdiń deńgeıin baǵalaý;
– qarjylyq qyzmetterdi kórsetý protsesindegi júıeli máselelerdi aıqyndaý;
– qyzmet kórsetý sapasyn, ótinishterdi qaraý úderisterin jaqsartýǵa usynystar ázirleý.
7. Jeke tulǵalardyń problemalyq nesıelerin azaıtýǵa baǵyttalǵan jyl saıynǵy is-qımyl josparlarynyń oryndalýyn baqylaý jáne qabyldanǵan sharalardyń tıimdiligin baǵalaý.
8. Іshki qujattarda kórsetilgen ýákiletti tulǵalar men qurylymdarǵa:
– qarjy ónimderin ázirleý, jarnama jáne taratý barysyndaǵy kemshilikter týraly;
– klıentterge qyzmet kórsetý men aqparat ashý rásimderindegi zańbuzýshylyqtar týraly;
– nesıeleý protsesindegi kemshilikter týraly;
– problemalyq aktıvterdi basqarý isindegi kemshilikter týraly;
– bank sharttaryna ózgerister engizý jáne shyǵyndy óteý jónindegi ótinishterdi qaraý barysyndaǵy olqylyqtar týraly aqparat berý.
9. Banktik ombýdsmen sheshimderiniń oryndalýyn baqylaý.
10. Klıentterdiń quqyqtary men múddeleriniń saqtalýy jónindegi máseleler boıynsha dırektorlar keńesine esep berý.
11. Osy baǵyttaǵy máselelerde ýákiletti organmen jedel ózara is-qımyldy qamtamasyz etý.
Sonymen qatar klıentterdiń quqyqtary men múddelerin saqtaý saıasaty men rásimderi mynadaı aspektilerdi qamtıdy:
– qarjy ónimderin usyný kezinde bank qyzmetkerleri men agentterdiń ádep normalary;
– qarjy ónimderin usyný tártibi jáne barlyq kezeńderde ashyq túrde berilýge tıis aqparat tizimi;
– ýákiletti agentterdiń tizimi jáne olardyń bank ónimderin usyný rásimderi;
– klıenttermen tikeleı jumys isteıtin qyzmetkerler men agentterge qoıylatyn biliktilik talaptary;
– adal emes tájirıbelerdi anyqtaý jáne aldyn alý rásimderi;
– klıentterdiń ótinishteri men shyǵyndy óteý máseleleri boıynsha sheshim qabyldaýǵa qatysatyn tulǵalardyń mindetteri men ókilettikteri;
– ótinishterdi, sonyń ishinde bank nesıelik sharttaryna ózgeris engizý jónindegi ótinishterdi qaraý jáne sheshim qabyldaý rásimderi, ár kezeńniń naqty merzimderimen.
Agenttik bekitken bul jańa erejeler 2025 jylǵy 16 tamyzdan bastap kúshine enedi.
Buǵan deıin, ekinshi deńgeıdegi bankter, rezıdent emes bank fılıaldary jáne Qazaqstannyń damý bankiniń esepti usyný qaǵıdasy jańartylǵanyn jazǵanbyz.