Bankterge qaryz dármensiz boryshkerlerdiń sany azaıdy - UB
ASTANA. QazAqparat - QR Parlament Senatynda QR Ulttyq banki tóraǵasynyń orynbasary Alpysbaı Ahmetov qarjylyq qyzmet tutynýshylarynyń quqyǵyn qorǵaý máselelerine qatysty qolǵa alynǵan jumystardyń nátıjesi týraly aıtty, dep habarlaıdy «QazAqparat» HAA tilshisi.
Otyrys barysynda senatorlardan Ulttyq banktiń jumysyna qatysty birqatar suraqtar kelip tústi. Sonyń biri - boryshkerlerdiń bankke tóleı almaǵan qaryzdaryn qaıtarý máselesi. Ásirese, senatorlar tarapynan 2015-2017 jyldan beri qabyldan zańnamalar boryshkerlerdiń qaryzyn bankterge qaıtarýǵa qanshalyqty serpin berdi degen saýaldyń salmaǵy basym boldy.
Senatorlardyń suraǵyna QR Ulttyq banki tóraǵasynyń orynbasary Alpysbaı Ahmetov jaýap berdi.
«Barlyq zańnamalar boryshkerlerdiń múddesin qorǵaýǵa baǵyttalyp otyr. Qolǵa alǵan jumystardyń arqasynda bankterge boryshkerler retinde tirkelgen áleýmettiń osal toptaryna jatatyn adamdardyń sany azaıdy. Olardy barlyq oblys ákimderiniń orynbasarlary bastaǵan komıssııa birinshi bolyp qabyldady. Osylaısha, áleýmettik osal toptardyń adamdarynyń tóleı almaı jatqan banktegi qaryzdaryn keshirýge qol jetkizdik», - deıdi Alpysbaı Ahmetov.
Onyń aıtýynsha, Ulttyq bank 2,95 paıyzben bankterge 330 mlrd teńge qarjy bergen.
««Bankterdiń 0,5 paıyzdy ǵana qosýǵa quqyqtary boldy. Halyqqa 3 paıyzben tek teńgemen nesıe berýge mindetteldi. 3 paıyzben nesıe berse, keıin bankter 2,95 paıyzdy problemalyq nesıelik qorǵa qaıtarýy kerek bolatyn. Biz bankilerge problemalyq nesıe qoryna bul paıyzdy qaıtarmaı-aq sol paıyz sotta isi qaralyp jatqan adamdardyń qaryzyn óteýge jumsalsyn dep shart qoıdyq. Birinshi nátıje osy. Máselesi sheshilmeı jatqan boryshkerler nesıeni basqa valıýtamen alǵan. Teńgemen alǵandardyń kóbiniń máselesi sheshildi. Bankter qazirgi ýaqytta nesıe berer aldynda klıentiniń qarjy jaǵdaıyn jaqsy zertteýi kerek. Eger onyń aılyǵynyń jartysy aılyq nesıeni qaıtarýǵa jetpese oǵan nesıe berilmeıdi», - deıdi ol.
