Bankterge halyqqa emes, bızneske nesıe berý tıimdi bola tústi — Tımýr Súleımenov
ASTANA. KAZINFORM — Tutynýshylyq nesıeni shekteý sharalary halyqtyń zaım alýyn baıaýlatýǵa septigin tıgizdi. Bul týraly Ulttyq bank tóraǵasy Tımýr Súleımenov aıtty.
Onyń aıtýynsha, sońǵy 3-4 jyl boıy halyqtyń nesıe alý kólemi jyl saıyn shamamen 30 paıyzǵa ósip otyrdy. Sondyqtan jaǵdaı qosymsha shekteý sharalaryn qabyldaýdy talap etti.
— Halyqqa beriletin nesıelerge qatysty sektorlyq kontrtsıkldik kapıtal býferin engizdik. Nesıe merzimine baılanysty qosymsha shekteýler qabyldadyq. Esterińizde bolsa, buryn tutynýshylyq nesıelerdi bes, jeti, segiz, tipti toǵyz jylǵa deıin berýge bolatyn. Negizinde bul aı saıynǵy tólem mólsherin azaıtyp, prýdentsııalyq talaptardy aınalyp ótý úshin jasalatyn. Biz buǵan shekteý qoıdyq, — dedi Tımýr Súleımenov Májilis kýlýarynda.
Sonymen qatar ol bankter úshin salyq sharttaryn ózgertilgenin atap ótti.
— Endi halyqqa beriletin nesıelerge korporatıvtik tabys salyǵynyń 25 paıyzdyq mólsherlemesi qoldanylady, al bızneske beriletin nesıeler úshin 20 paıyzdyq mólsherleme saqtalady. Osylaısha, bankterde tek halyqty ǵana emes, bıznesti de nesıelendirýge qosymsha ynta paıda bolady, — dep túsindirdi Ulttyq bank basshysy.
Tımýr Súleımenovtiń atap ótýinshe, qabyldanǵan sharalar qazirdiń ózinde nátıje berip jatyr. Halyqty nesıelendirý qarqyny baıaýlap, al bıznesti nesıelendirý ósimin jalǵastyryp, 18 paıyzǵa jetti.
Buǵan deıin elimizde nesıe bergende, qaryz júktemesin esepteý erejesi ózgeretinin jazǵan edik.
